सुर्खेत – मध्यपश्चिमाञ्चल विश्वविद्यालयका निलम्बित रजिस्ट्रार डा. महेन्द्रकुमार मल्लमाथि छानबिन गर्न प्रधानमन्त्री तथा कूलपति केपी शर्मा ओलीको उपस्थितिमा बसेको विश्वविद्यालय सभाले छानबिन समिति गठन गरेको छ ।

छानबिन समितिको संयोजकमा राष्टिय योजना आयोगका सदस्य उषा झा चयन भएका छन् । शिक्षा मन्त्रालयका सचिव खगराज बराल र विश्वविद्यालय अनुदान आयोगको प्रतिनिधि सदस्य रहेका छन् । समितिले बिहीवारदेखि नै काम शुरू गरेको जनाइएको छ ।

विश्वविद्यालय सभाले रजिस्टार मल्ललाई निलम्बन गर्दै कामचलाउ रजिस्ट्रारको जिम्मेवारी डीन यामबहादुर कार्कीलाई दिएको छ । विगत २ महिनादेखि उपकूलपति प्रा.डा. उपेन्द्र कोइरालासँग विवाद देखिएपछि मल्ल निलम्बित भएका हुन् ।

रजिस्ट्रारले पदीय आचरण अनुरुपको व्यवहार नगरेको भन्दै विश्वविद्यालय सभाका १० जना सदस्यले बिहीवार कूलपति तथा प्रधानमन्त्री ओली समक्ष निवेदन दिएका थिए । बिहीवार नै प्रधानमन्त्री ओलीले छानबिन समिति गठन गरी मल्ललाई जिम्मेवारीमुक्त गरेका हुन् ।

नवनियुक्त कामचलाउ रजिस्टार कार्की त्रिभुवन विश्वविद्यालय स्वास्थ्य केन्द्रीय विभागमा सहप्राध्यापकका रूपमा कार्यरत रहेपनि हाल मध्यपश्चिमाञ्चल विश्वविद्यालय शिक्षाशास्त्र संकायमा डीन छन् ।

यस्तो छ कानूनी प्रावधान

मध्यपश्चिमाञ्चल विश्वविद्यालय ऐन २०६७ बमोजिम उपकुलपति, रजिस्टार र सेवा आयोग अध्यक्ष बर्खास्त गर्नको लागि सिनेटको एकचौथाई सदस्यले कूलपति (प्रधानमन्त्री) समक्ष निवेदन दिनुपर्छ । त्यसपछि कुलपतिले ३ सदस्यीय छानबिन समिति गठन गर्नुपर्छ । 

समितिमा कूलपतिले तोकेको व्यक्ति संयोजक र शिक्षा मन्त्रालयको सचिव र विश्वविद्यालय अनुदान आयोगको प्रतिनिधि सदस्य रहने प्रावधान छ । समितिलाई १ महिनाभित्र प्रतिवेदन दिने म्याद दिइन्छ । समितिले दिएको प्रतिवेदन सिनेट बैठकमा प्रस्तुत हुन्छ । 

प्रतिवेदनमा निज पदाधिकारीलाई हटाउने राय भएमा सिनेट बैठकले बहुमतबाट निर्णय गरेमा पदाधिकारी पदमुक्त हुने प्रावधान रहेको छ । त्यसरी हटाउनुपर्ने भएको खण्डमा निजलाई स्पष्टीकरणको मौका पनि दिनुपर्ने ऐनमा उल्लेख छ ।

विद्यार्थी र प्राध्यापक आन्दोलित

मध्यपश्चिमाञ्चल विश्वविद्यालयमा नेपाली कांग्रेस निकट प्रजातन्त्रवादी प्राध्यापक संघ र नेपाल विद्यार्थी संघले आन्दोलनको शुरूवात गरेका छन् ।

रजिस्टारलाई काममा रोक लगाइएको निर्णयको विरोध गर्दै आइतवारबाट पठनपाठन बन्द गर्ने घोषणा गरेका छन् ।