काठमाडौं — अमेरिकाका राष्ट्रपति डोनल्ड ट्रम्पले परराष्ट्र मन्त्रालयकी प्रवक्ता हेदर नावर्टलाई संयुक्त राष्ट्रसंघको नयाँ राजदूतका रूपमा घोषणा गर्न लागेको अमेरिकी सञ्चारमाध्यमहरूले लेखेका छन् । 

नावर्ट पहिले फक्स न्युजमा कार्यक्रम प्रस्तोता थिइन् र त्यही फक्सले पनि उनलाई राजदूत बनाइन लागेको खबर दियो । 

बहालवाला राजदूत निक्की हेलीले अक्टोबर महिनामा पदबाट राजीनामा दिएको घोषणा गरेकी थिइन् । उनी डिसेम्बर ३० सम्म मात्र पदमा रहनेछिन् । 

अडचालीस वर्षीया नावर्टलाई सन् २०१७ को अप्रिल महिनामा प्रवक्ता बनाइएको थियो । उनी सरकारी पदमा पहिलोपटक नियुक्त भएकी हुन् । 

ट्रम्पले यो नियुक्तिका विषयमा शुक्रवार ट्वीट गर्ने फक्स न्युजले जानकारी दियो । ब्लूमबर्गले चाहिँ नावर्टलाई नियुक्त गर्ने निर्णयका विषयमा तीन स्रोतबाट जानकारी आएको जनायो । 

परराष्ट्र मन्त्रालयले यस विषयमा कुनै टिप्पणी गरेन । 

ब्लूमबर्गले नावर्ट यो पदका लागि अपरम्परागत विकल्प रहेको बतायो किनकि उनीसँग सरकारी पदको वा परराष्ट्रनीतिको एकदमै कम अनुभव छ । परराष्ट्र मन्त्रालयमा नियुक्त भएपछि नावर्टलाई सार्वजनिक कूटनीति र सार्वजनिक
मामिलाका उपसचिवका रूपमा यसै वर्षको मार्च महिनामा नियुक्त गरिएको हो । 

उनलाई राष्ट्रसंघमा नियुक्त गरिएपछि त्यसलाई अमेरिकी सिनेटले समर्थन गर्नुपर्छ ।

बीबीसीबाट