काठमाडौं- कांग्रेसको महासमिति बैठक आजबाट शुरु हुँदैछ । राजधानीको यलम्बर पार्टी प्यालेसमा केही बेरमा शुरु हुने बैठकमा सहभागीहरु २१ सय भन्दा धेरै प्रतिनिध र पर्यवेक्षक कार्यक्रम स्थल पुगेका छन् । 

बैठकको उद्घाटनापछि केही बेर औपचारिक कार्यक्रम सञ्चालन हुनेछ । त्यसपछि आजैबाट बन्दसत्रको कार्यक्रम रहेको छ । 

महासमिति बैठकमा २१ सय १० जना प्रतिनिधि र पर्यवेक्षक सहभागी हुने तय भएको कांग्रेसले जनाएको छ । करिब १६ सय प्रतिनिधि र करिब ५०० पर्यवेक्ष रहने कांग्रेसले जनाएको छ । 

उद्घाटन पछिको कार्यक्रममा विमलेन्द्र निधिले राजनीतिक, महामन्त्री शशांक कोइरालाले सांगठानिक र सितादेवी यादवले आर्थिक प्रतिवेदन पेश गर्नेछन् । विभिन्न प्रतिवेदनमाथि प्रतिनिधहरुले छलफल गर्ने कार्यक्रम रहेको छ । बन्दसत्रमा विधानमा पेस भएका प्रस्ताव र प्रतिवेदनमाथि छलफल हुनेछ । सात प्रदेशका सात समूह बनाएर छलफल हुने प्रवक्ता विश्वप्रकाश शर्माले बताए ।

महासमिति बैठकपछि कांग्रेस थप सशक्त बनेर आउँने नेता प्रकाशशरण महतले बताए । ‘ बैठक पछि पार्टीमा देखिएका सबै समस्या समाधान हुन्छ र कांग्रेस थप शसक्त बनेर आउँछ’ महतले भने । 

महामन्त्री शशांक कोइरालाले महासमिति बैठकमा हिन्दूराष्ट्रको मुद्दा उठ्ने बताए । लोकान्तरसँगको संक्षिप्त कुराकानीमा कोइरालाले भने,‘हिन्दूराष्ट्रको विषयमा महासमिति बैठकमा छलफल हुन्छ, यो विषयमा तपाइहरुले एक दुई दिनमा थाहा पाउनु हुनेछ ।’

कांग्रेसको विधानअनुसार हरेक वर्ष हुनुपर्ने महासमिति बैठक ६ वर्षपछि हुन लागेको हो ।  यसअघि ०६९ चैतमा महासमितिको नवौँ बैठक भएको थियो । शेरबहादुर देउवा सभापतिमा निर्वाचित भएको ३२ महिनापछि बैठक हुन लागेको हो ।   

पार्टीका नीतिगत निर्णयहरूका लागि कांग्रेसमा महासमिति बैठक महत्वपूर्ण मानिन्छ । महासमितिले विधान संशोधनलाई दुईतिहाइले पास गर्नेदेखि पार्टीको भावी राजनीतिक दिशा तय गर्नेछ । 

स्थानीय तह, प्रदेश र संघीय संसद्को निर्वाचनमा पराजय व्यहोरेपछि हुन लागेकाले यो महासमिति बैठकलाई कांग्रेस वृत्तले महत्वसाथ हेरेको छ । पार्टीलाई राजनीतिक उचाइ दिने गरी नीति, कार्यक्रम र संगठन बनाउनुपर्ने दबाब बैठकमा उठ्ने नेताहरूले बताएका छन् । 

यो पनि पढ्नुहोस्

कांग्रेस महासमिति बैठकको मेन्यु– छोला भटूरादेखि मटन राइससम्म, खानामा दिनको १० लाख खर्च

निधिलाई भण्डारीको चुनौती : ‘हात मात्र हाल्दैनौं, जे-जे गर्नुपर्छ त्यो सबै गर्छौं’

कांग्रेसको प्रतिवेदन – नेकपा सर्वसत्तावादी, मधेसवादी दल घोर साम्प्रदायिक [प्रतिवेदनसहित]

कांग्रेसमा गुटभित्रै तनाव : पौडेलभन्दा देउवालाई हाइसञ्चो !

पार्टीभित्र र बाहिर धेरैलाई चुनौती बन्दै गगन