काठमाडौं – बहुप्रतिक्षीय मेलम्ची खानेपानी आयोजनाको निर्माण कार्य अलपत्र पारेर भाग्न खोज्ने इटालियन ठेकेदार कम्पनीका प्रतिनिधि र कर्मचारीलाई खानेपानी मन्त्रालयले नियन्त्रणमा लिएको छ ।

काम छाडेर नेपालबाट बाहिरिन खोजेको सूचनामा आधारमा खानेपानी मन्त्रालयले गृह मन्त्रालयको सहयोगमा इटालियन कम्पनी सीएमसीका कर्मचारीलाई नियन्त्रणमा लिएको हो ।

इटलियन कम्पनी सीएमसीका आयोजनाका परियोजना व्यवस्थापक क्रिश्चियानो ग्रेचोसहित ८ जनालाई आइतवार काठमाडौंको ठमेलबाट नियन्त्रणमा लिइएको महानगरीय अपराध महाशाखाका प्रमुख एसएसपी धिरजप्रताप सिंहले बताए । उनीहरूले राति साढे ११ बजे टिकट लिएर भाग्न खोजेका थिए ।

परियोजना व्यवस्थापक र कर्मचारीलाई नियन्त्रणमा लिएर खानेपानी मन्त्रालयको जिम्मा लगाइएको र मन्त्रालयले नै कारवाही प्रक्रिया अगाडि बढाएको सिंहले बताए । खानेपानी मन्त्रालयले सबैको पासपोर्ट समेत जफत गरेको छ ।

ठेकेदार कम्पनीले निर्माण कार्यबाट हात झिक्न खोजेपछि बहुप्रतिक्षीत मेलम्ची खानेपानी आयोजना अलपत्र परेको छ ।