काठमाडौं — भारतको मुम्बईमा रहेको ईएसआईसी कामगर अस्पतालमा सोमवार दिउँसो आगो लाग्दा आठजनाको मृत्यु भएको छ भने १४५ जना घाइते भएका छन् । घाइतेमध्ये २८ जनाको स्थिति गम्भीर छ ।

भीषण आगो निभाउनका लागि अग्निनियन्त्रकहरूलाई तीन घन्टाभन्दा बढी समय लागेको थियो । 

मर्नेमा ६ महिनाकी एक शिशु पनि थिइन् । एक महिला उद्धार हुने क्रममा उद्धारकर्मीसँगै क्रेनबाट लडेर मरिन् । 

भुइँतल्लामा रहेको एउटा झ्यालमा रहेको एसीमा शर्ट सर्किट हुँदा आगो लागेको हुन सक्ने बताइएको छ । अस्पतालको भवन पाँच तल्ले छ । 

एमआईडीसी अग्निनियन्त्रण अधिकारीका अनुसार, अस्पतालमा संरचनागत समस्या थिए र पर्याप्त सुरक्षा व्यवस्था थिएन । 

अस्पताल भवन असुरक्षित रहेको भनी चेतावनी जारी गरिएको भए पनि त्यसलाई बेवास्ता गरिएकाले धनजनको व्यापक क्षति भएको अग्निनियन्त्रक अधिकारीहरूको आरोप छ । 

एजेन्सी