काठमाडौँ – नेपाल कम्युनिस्ट पार्टी (नेकपा)को स्थायी कमिटी बैठकमा लिपुलेकको विषय उठेको छ । स्थायी कमिटी सदस्य लेखराज भट्टले आफ्नो धारणा राख्ने क्रममा त्रिदेशीय पारवाहन बिन्दुको रूपमा रहेको लिपुलेकको विषयमा नेकपाको आधिकारिक धारणा के हो भनेर बैठकमा प्रश्न गरेका थिए ।

दार्चुला जिल्लामा पर्ने लिपुलेकलाई भारत र चीनले आफूखुसी ‘ट्रेड ट्रान्जिट’ बनाउने सहमतिमा हस्ताक्षर गरेका थिए । नेपाली भूमिलाई आफू अनुकुल प्रयोग गर्ने भारत र चीनको सहमतिलाई नेपालका सीमाविद् र राजनीतिक विश्लेषकहरूले आलोचना गर्दै आइरहेका छन् ।

नेपालको सहमतिबिना चार वर्षअघि भारत र चीनबीच मात्र भएको उक्त सम्झौता खारेज गर्न यसअघिका कुनै पनि सरकारले पहल गरेको छैन भन्दै भट्टले लोकान्तरसँग भने, ‘भारत र चीनसँग नेपालको सम्बन्ध सुध्रेको छ भनेर गफ दिने, तर लिपुलेकको बारेमा बोल्न डराउने ?’ 

आफ्नो पार्टी नेतृत्वको सरकारले भारत र चीनले आफूखुसी गरेको निर्णय फिर्ता गराउन पहल गर्नुपर्ने भट्टको भनाइ थियो ।

बैठकमा भट्टले अध्यक्षद्वयले प्रस्ताव गरेको राजनीतिक प्रतिवेदन सारमा ठीक रहेको तर व्याख्या र विश्लेषण बढी भएको भन्दै आलोचनारहित चाहिं नदेखिएको टिप्पणी गरेका छन् । ‘अध्यक्षद्वयको प्रतिवेदनमा व्याख्या बढी भयो, त्यति धेरै व्याख्या गर्नुपर्ने जरुरत थिएन’ भट्ट भन्छन्, ‘सरकारले गरेका काम हामीलाई थाहा नदिने प्रवृत्ति ठीक होइन । जनतामा पनि राम्रोसँग सूचना गएको छैन,यसकारण जनता निराश छन् ।’

आजको बैठकमा देवप्रसाद गुरुङ, रघुवीर महासेठ, भीमप्रसाद आचार्य, रघुजी पन्त, बर्षमान पुन, सुरेन्द्र पाण्डे, लेखराज भट्ट र पुष्प कँडेलले राजनीतिक प्रतिवेदनका सम्बन्धमा आआफ्नो विचार व्यक्त गरेसँगै बैठक सकिएको छ । बैठक भोलि २०७५ पुस ५ गते बिहान ८ बजेदेखि पार्र्टी केन्द्रीय कार्यालयंमा शुरु हुने गरी स्थगित भएको पार्टी प्रवक्ता नारायणकाजी श्रेष्ठले जानकारी दिए ।