काठमाडौं — भारतको तमिलनाडु राज्यमा कान दुखेर हैरान परेका एक रोगीको उपचारका क्रममा आश्चर्यजनक कुरा सार्वजनिक भएको छ । 

रोगीको दिमागको केही भाग एउटा कानको प्वालबाट चुहिरहेको पाइयो । आठ घन्टासम्म चलेको शल्यक्रियापछि चिकित्सकहरूले दिमागको चुहिएको भाग काटेर अनि कानको प्वाल बन्द गरिदिए । 

एक निजी कम्पनीमा लेखापरीक्षक रहेका लोगननाथनलाई केही समयअघि कानमा मासु उठेको जस्तो लाग्यो । चिकित्सकलाई देखाउँदा उनको कानमा दुलो परेको बताए ।

अपोलो अस्पतालका सर्जन डा जोय भर्गिजले भने, ‘हामीले आँखैले रोगीको कानबाटै उसको मस्तिष्क देख्यौं । अनि हामीले उनलाई शल्यक्रिया गर्ने सल्लाह दियौं र दुलो बन्द गरिदियौं ।’ 

चिकित्सकहरूका अनुसार, यस्तो स्थितिमा ज्यानै जान पनि सक्छ । अनि गम्भीर संक्रमणको खतरा पनि हुन्छ । 

लोगननाथनले भने, ‘म अनौठा आवाज सुनिरहन्थें । मुटुको ढुकढुकीको आवाज आइरहेको जस्तो लाग्थ्यो । मैले शल्यक्रिया गराउनैपर्ने भयो भन्ने ठानेको थिएँ । शल्यक्रियापछि म ठीक छु । अनौठो आवाज आउन बन्द भएको छ ।’

चिकित्सकहरूले कानको बाटो भएर दिमागको एक भाग कसरी बाहिर आयो होला भन्ने विषयमा केही स्पष्ट बताउन सकेका छैनन् । दुर्घटनाका कारण वा कानमा लामो समयदेखिको संक्रमणका कारण यसो भएको हुनसक्ने उनीहरू
अनुमान गर्छन् । 

एजेन्सी