काठमाडौं — अमेरिकाको विपक्षी डेमोक्रेटिक पार्टीमा तीव्र गतिमा उदय भइरहेकी नेत्री अलेक्जेन्ड्रिया ओकासियो–कोर्टेजले नेतृत्वमा पुगेका महिलाप्रति रूढिवादी मिडियाले गर्ने व्यवहारको निन्दा गरेकी छन् । कन्जर्भेटिभ वेबसाइट
डेली कलरले बाथटबमा नग्न भएर नुहाइरहेको उनको झूटो तस्वीर प्रकाशित गरेपछि उनी आक्रोशित भएकी हुन् । 

दक्षिणपन्थी वेबसाइटले बाथटबमा एक महिलाको नांगो गोडा देखिएको तस्वीर छापेको थियो र यस्तो हेडलाइन दिएको थियो, ‘केही मानिसले अलेक्जेन्ड्रिया ओकासियो–कोर्टेजको नग्न सेल्फी भनी वर्णन गरेको फोटो यही हो ।’

ओकासियो–कोर्टेजले बिहीवार राति ट्विटरमा लेख्दै अविश्वसनीय तस्वीरलाई एक प्रमुख कन्जर्भेटिभ आउटलेटले प्रयोग गरेकोबाट नेतृत्वमा रहेका महिलामाथि बढी चियोचर्चो हुने गरेको देखाएको भनिन् । 

उनले डेली कलरको यस्तो काम कुनै न कुनै बेलामा सार्वजनिक हुने नै थियो किनकि रिपब्लिकनहरूले एक हप्तादेखि मुखमा फिँज काढेर बसिरहेका थिए भनिन् । मुखमा फिँज काढ्ने भनी उनले केलाई इंगित गरेको हो भनेर चाहिँ
खुलाइनन् । 

उनले द डेली मेलको पनि आलोचना गर्दै आफ्नो प्रेमीको घरमा संवाददाता पठाएर समाचार दिनका लागि पैसा तिरेको आरोप समेत लगाइन् । 

गत जुन महिनामा ओकासियो–कोर्टेजले विगत २० वर्षदेखि जित्दै आएका न्युयोर्कका एक सांसदलाई प्राइमरीमा हराएर राजनीतिक सनसनी मच्चाएकी थिइन् । उनले नोभेम्बरमा सम्पन्न आमनिर्वाचनमा विजय हासिल गरिन् । युवा
डेमोक्रेटिक नेताहरूको नयाँ पुस्ताभित्र नेतृत्वको पोजिसनमा उनले आफूलाई पु–याइन् । 

उनी अमेरिकी संसदमा सबभन्दा कान्छी उमेरकी सांसद हुन् र जम्मा २९ वर्षकी भइन् । उनले आफूलाई डेमोक्रेटिक समाजवादी भनी चिनाउने गरेकाले कन्जर्भेटिभहरू चिढिएका छन् र उनीमाथि निकै चुनौती आउन थालेका छन् । 

अघिल्लो हप्ता ट्विटरमा एक व्यक्तिले उनी कलेजमा हुँदा छतमा नाचेको एउटा भिडियो अप्लोड गरेपछि निकै विरोध उठेको थियो ।

द गार्डियनबाट