अफगानिस्तानको जेलमा थुनिएका सुसाइड बम्बर बालबालिका, आयो खतरनाक तथ्य

माघ १, २०७५

काठमाडौं — अफगानिस्तानमा बालबालिका सम्बन्धी खतरनाक तथ्य सार्वजनिक भएको छ । 

त्यहाँ आतंकवादी संगठनहरूले बालबालिकालाई आत्मघाती आक्रमणकारी अर्थात् सुसाइड बम्बर बनाइरहेका छन् । ती बालबालिकाको उमेर बढीमा आठ वर्ष छ । 


ADVERTISEMENT

न्युयोर्क टाइम्सको रिपोर्टअनुसार, सुसाइड बम्बर बन्ने वा त्यसको तयारी गर्ने लगभग ४७ बालबालिका काबुलस्थित बादाम बागको जुभेनाइल डिटेन्सन सेन्टरमा थुनिएका छन् । यीमध्ये केहीलाई त आफ्नो अपराध के हो भन्ने समेत थाहा छैन । 

देशको सुरक्षामा खतरा हुनसक्ने भनी थुनिएका बालबालिका आठदेखि १० वर्ष उमेरका छन् । 

केही बालबालिकालाई आफ्नो भूलको पश्चात्ताप छ । ईदमा भेट्नका लागि आफ्नो परिवारको कोही पनि नआएको उनीहरूलाई दुःख छ । तर यसका लागि उनीहरू आफैंलाई जिम्मेवार मान्छन् । 

थुनामा राखिएका यी ४७ बालबालिकामाथि विस्फोटको षड्यन्त्र रचेको आरोप छ । अधिकारीहरू बालबालिकाको सजाय सकिएपछि के हुन्छ भन्ने कुराले चिन्तामा परेका छन् । 

यी बालबालिकालाई दुई वर्षदेखि १० वर्षसम्मको सजाय सुनाइएको छ । न्युयोर्क टाइम्सका पत्रकारलाई जेलसम्म पुग्न पनि अफगान मन्त्रालयको स्वीकृति लिनुपरेको थियो । यसैबीच केही बालबालिकाले रिपोर्टरसँग कुराकानी गर्न समेत मानेनन् । 

बालबालिकालाई फरक फरक ठाउँबाट पक्राउ गरेर यहाँ राखिएको हो । तालिबानले उनीहरूलाई सुसाइड बम्बर बनाएको हो । आफूहरूलाई जबर्जस्ती सुसाइड बम्बर बनाइएको उनीहरूको भनाइ छ ।

एजेन्सी

माघ १, २०७५ मा प्रकाशित

प्रतिक्रिया दिनुहोस