काठमाडौं — पूर्वी अस्ट्रेलियामा सुक्खाप्रभावित ठूला नदीका किनारामा लाखौं मृत माछाहरू फेला परेका छन् । यसले वातावरण सन्तुलन खतरामा परेको देखाएको छ । 

अधिकारीहरूले यी माछाहरूको संख्या अझै बढ्न सक्ने सोमवार बताएका छन् । 

मर्रे डार्लिङ नदीको किनारामा सडेका माछा बग्रेल्ती छन् । अधिकारीहरूले मरेका माछाको संख्या १० लाखसम्म पुग्न सक्ने बताएका छन् । 

न्यु साउथ वेल्स सरकारले चेताएअनुसार, यही हप्ता तापक्रम झनै बढेकाले स्थिति अझै खराब हुने सम्भावना छ । पानीको कमी र तापक्रम वृद्धिका कारण माछाहरूलाई अक्सिजनको कमी भएको र विषाक्त तत्त्व उत्पन्न भएको छ । 

माछाहरू मर्ने घटना राष्ट्रिय मुद्दा बनेको छ र यसको कारणका विषयमा दोषारोपणको सिलसिला शुरू भएको छ । 

अस्ट्रेलियन नेसनल युनिभर्सिटीको जल अर्थव्यवस्था विशेषज्ञ जोन विलियम्सले माछा र नदीहरू सुक्खाका कारण नमरेको, बरू हामीले नदीबाट अत्यधिक पानी निकालेका कारण मरेको बताए । 

एजेन्सी