काठमाडौं — आतंकवादी लडाकूहरूले केन्याको राजधानी नैरोबीमा रहेको एक विलासी होटलमा आक्रमण गरेर कम्तीमा ६ जनाको हत्या गरेका छन् । 

नैरोवीको वेस्टल्यान्ड्समा रहेको होटल प्रांगणमा गोलीबारी र विस्फोटका आवाजहरू सुनिएका थिए । त्यहाँ डुसिटडी२ होटलका साथै कार्यालयहरू छन् । 

सोमालियामा रहेको लडाकू समूह अल–शबाबले आक्रमणको जिम्मेवारी लिएको छ । 

मंगलवार बेलुकासम्म सबै भवनहरू सुरक्षित गरिएको सरकारले दाबी गरेपनि पछि पछि गोली चलेको आवाज आएको थियो । 

अधिकारी र प्रत्यक्षदर्शीहरूले उक्त भवनमा रहेको एक रेस्टुराँमा कम्तीमा पाँचजना मारिएको अनि अर्का एक व्यक्तिको मृत्यु अस्पतालमा भएको बताए । 

मारिनेमा एक अमेरिकी नागरिक पनि रहेको अमेरिकाको परराष्ट्र मन्त्रालयले जनाएको छ । 

तर मारिनेको कुल संख्या अझै पुष्टि भइसकेको छैन । एक शवघर कर्मचारीले रोयटर्स समाचार संस्थालाई बताएअनुसार, कम्तीमा १५ जनाको मृत्यु भएको छ । 

आक्रमण स्थानीय समयअनुसार, दिउँसो ३ बजे शुरू भएको हो । बन्दूकधारीहरूले कार पार्कमा बम फालेर लब्बी छिरेका थिए । त्यहाँ एकजनाले आत्मघाती विस्फोट गराएको केन्याली प्रहरी प्रमुख जोसेफ बोइन्नेटले पत्रकारलाई बताए । 

बीबीसीबाट