काठमाडौं – प्रतिनिधि सभाको शुक्रवारको बैठकमा प्रधानमन्त्री केपी शर्मा ओलीसँग प्रश्नोत्तर कार्यक्रम हुने भएको छ । 

प्रतिनिधिसभा नियमावलीको परिच्छेद ९ नियम ५६ अनुसार शुक्रवार प्रधानमन्त्रीसँग प्रत्यक्ष प्रश्नोत्तर कार्यक्रम राखिएको सभामुख कृष्णबहादुर महराका प्रेस संयोजक डिल्ली मल्लले जानकारी दिए ।

प्रतिनिधि सभाको बैठक शुक्रवार दिउँसो १२ बजे बस्दैछ । साथै सोही बैठकमा प्रधानमन्त्री ओलीले आसन्न स्वीट्जरल्यान्ड भ्रमणका बारेमा संसदलाई जानकारी गराउने कार्यक्रम रहेको संसद सचिवालय स्रोतले जानकारी दियो । 

यसअघि गएको पुस २२ गते प्रधानमन्त्री ओलीले संसदमा सम्वोधन गरेपछि प्रश्न गर्न नपाएको भन्दै कांग्रेसले आपत्ति जनाएको थियो । शुक्रवार प्रधामनन्त्री ओलीसँग प्रश्न सोध्ने तयारी गरेको छ ।