बुटवल – ५ नम्बर प्रदेशसभा र सरकारले खरिद गरेको गाडीमा अनियमितता भएको सूचना आएपछि विपक्षी दलका नेताले आफू चढ्दै आएका गाडी धमाधम बुझाउन थालेका छन् ।

विवादित र आर्थिक अनियमितता गरेर खरिद गरेका गाडीहरू नचढ्ने भन्दै नेपाली कांग्रेसका नेताले प्रयोग गर्दै आएका गाडी प्रदेशसभा सचिवालयमा धमाधम बुझाएका हुन् ।

शुक्रवार नेपाली कांग्रेस संसदीय दलका नेता बलदेश शर्मा पोखरेलले आफू चढ्दै आएको गाडी प्रदेशसभा सचिवालयका सचिव दुर्लभकुमार पुनलाई बुझाएका छन् । पोखरेलले आफू चढ्दै आएको लु१झ ४४७ नम्बर गाडी पुनलाई हस्तान्तरण गरेका हुन् ।

गत पुस २७ गते प्रदेशको सार्वजनिक लेखा समितिका सभापति डिल्लीबहादुर चौधरीले पनि अनियमितता छानबिन गर्न नैतिक संकट आउने भन्दै सत्यतथ्य बाहिर नआउँदासम्म आफूले चढ्दै आएको लु१झ ४४१ नम्बरको गाडी प्रदेश सभालाई बुझाएका थिए ।

गाडी हस्तान्तरण गर्दै पोखरेलले भने, प्रदेशसभाले खरिद गरेका गाडीमा अनियमितता भएको बाहिर आएको छ । ‘सार्वजनिक लेखा समितिले त्यसको अनुसन्धान गर्दैछ । सत्यतथ्य बाहिर नआउँदासम्म नैतिकताका आधारले यो गाडी चढ्न मिलेन त्यसैले प्रदेशसभा सचिवालयमा बुझाए,’ उनले भने ।

गाडी बुझाएर पोखरेल र उनका स्वकीय सचिव सञ्जिव बस्याल ना१ह ६८१६ नम्बरको अटो रिक्सामा चढेर आफ्नो घर तिलोत्तमा गएका थिए ।

दलका नेता पोखरेलले बुझाएको गाडी आफूहरूले सुरक्षित राख्ने प्रदेशसभा सचिव पुनले जानकारी दिए । ‘उहाँले गाडी बुझाउनुभयो । हामी सुरक्षित राख्छौ,’ सचिव पुनले सञ्चारकर्मीलाई भने ।

प्रदेशसभा सचिवालयले उपसभामुखसहित विषयगत समिति सभापतिका लागि १३ गाडी खरिद गरेको थियो । त्यसमध्ये ११ वटा टाटा स्ट्रोम भीएस फोर हवील गाडी हुन् । ११ वटा गाडी प्रदेशसभाले एउटा मूल्यमा र मन्त्रालयले अर्को मूल्यमा किनेको पाइएको छ । ती गाडीहरू बुटवल कालिकानगरस्थित सफल अटो इन्टरनेसनलबाट खरिद गरेको थियो । ती गाडीहरू बजार मूल्यभन्दा झण्डै ३ लाख ५० लाख रूपैयाँ बढीमा खरिद गरेको पाइएको हो ।

बजारमा ६८ लाख रूपैयाँ पर्ने गाडी ७२ लाखभन्दा बढी मूल्यमा प्रदेश सभाले खरिद गरेको खबर सार्वजनिक भएको छ । स्थानीय गाडी खरिदकर्तालाई सफलले ती गाडी ६८ लाख ५५ हजार रूपैयाँमा बिक्री गर्दै आइरहेको बताइएको छ ।

प्रदेशसभा सचिवालयले बजार मूल्यभन्दा बढीमा गाडी खरिद गरेको गुनासो आएपछि प्रदेश सभाको सार्वजनिक लेखा समितिले प्रारम्भिक अध्ययन समिति गठन गरेको छ । प्रारम्भिक अध्ययन समितिका सदस्य बैजनाथ कलवारले आफूहरू सुक्ष्म रूपमा अध्ययन गरेको जानकारी दिए ।