काठमाडौं – नेपाल कम्युनिस्ट पार्टीको नेतृत्व गरिरहेका नेत्रविक्रम चन्द ‘विप्लव’ले नेपालमा क्रान्ति अवश्यम्भावी बनेको बताएका छन् ।

फागुन १ गते जनयुद्ध दिवसको अवसरमा विप्लवले विज्ञप्ति जारी गर्दै क्रान्तिका लागि सबैको हातेमालो जरुरी रहेको बताएका छन् ।

२०५२ फागुन १ गते तत्कालीन माओवादीले पुष्पकमल दाहाल ’प्रचण्ड’को नेतृत्वमा जनयुद्ध शुरू गरेको थियो । २०६२/६३ सालको शान्ति प्रक्रियापछि प्रचण्डलाई संसदीय भासमा फसेको आरोप लगाएका विप्लवले नेपाल कम्युनिस्ट पार्टीको नेतृत्व गरिरहेका छन् ।

जनयुद्ध शुरू गरेको अवसरमा फागुन १ गतेलाई विशेष दिनको रूपमा सबै माओवादी घटकले विभिन्न तरिकाले मनाउँदै आइरहेका छन् । अर्धभूमिगत शैलीमा काम गरिरहेका विप्लवमाथि सरकारले निगरानी गरिरहेको छ ।