बुटवल – ५ नम्बर प्रदेशका नेकपा सांसद उत्तरकुमार वलीको उपचारको क्रममा निधन भएपछि प्रदेशसभा सचिवालय शुक्रवार बन्द हुने भएको छ । 

सभामुख पूर्णबहादुर घर्तीले शुक्रवार शोक विज्ञप्ति प्रकाशित गरी प्रदेशसभा सचिवालय एक दिनका लागि बन्द रहने र आफू पनि कुनै औपचारिक कार्यक्रममा सहभागी नहुने जानकारी गराए ।

गएको माघ २४ गते दाङमा दुर्घटनामा परी गम्भीर घाइते वलीको शुक्रवार बिहान काठमाडौंको मेडिसिटी अस्पतालमा निधन भएको छ ।

उनको अहिले काठमाडौंमा नेकपा पार्टी कार्यालयमा श्रद्धाञ्जलीका लागि राखिएको छ । दिउँसो हेलिकप्टरमार्फत् उनको शवलाई दाङ ल्याएर श्रद्धाञ्जलीका लागि राखिने छ । उनको शनिवार बिहान अन्तिम दाहसंस्कार गरिने बताइएको छ ।

दाङ क्षेत्र नम्बर ३ (ख) बाट तत्कालीन नेकपा एमालेबाट निर्वाचित भएका थिए । प्रदेशसभा सचिवालयका सचिव दुर्लभकुमार पुन मगरले सचिवालयमा शोक पुस्तिका राख्ने बताए । प्रदेशसभा फागुन १८ गतेसम्मका लागि स्थगित छ ।