विराटनगर– प्रदेश एकका मुख्यमन्त्री शेरधन राईले देशलाई सबल र समृद्ध राष्ट्र बनाउन दुर्व्यसन मुक्त समाज निर्माण गर्नुपर्ने बताएका छन् । खेलौं नशा रहित होली नारासहित विराटनगरमा आयोजित कार्यक्रमलाई सम्बोधन गर्दै मुख्यमन्त्री राईले यस्तो बताएका हुन् ।

उनले होली आपसी सदभाव र शान्तिको पर्व रहेकाले यो पर्वलाई सांस्कृतिकरुपमा मनाउन जोड दिए । पछिल्लो समय होली पर्वको नाममा मादक पदार्थ र विभिन्न प्रकारका नशालु पदार्थ सेवन गर्ने प्रवृति हावी हुँदै गएकाले त्यस्तो प्रवृतिबाट युवा पुस्तालाई जोगिन आग्रह गरे । उनले नशालु पदार्थको सेवनबाट व्यक्तिगत स्वास्थ्यसहित परिवार र सिंगो समाज नै प्रभावित हुने भएकाले नशारहित होली खेल्न आग्रह गरे ।

चलचित्र अभिनेत्री तथा निर्देशक दिपाश्री निरौलाले होली धार्मिक पृष्ठभुमिसँग जोडिएको पर्व रहेकाले मौलिकरुपमा मनाउनुपर्ने बिषयमा जोड दिइन् । कार्यक्रममा हास्यकलाकार पारस थापाले आफ्नो प्रहसन प्रस्तुत गरे भने गायक सुमित खड्काले होली विषेश गित प्रस्तुत गरिन् ।  

दुर्व्यसनविरुद्ध पुर्नस्थापनका क्षेत्रमा सक्रिय संघसंस्थाको आयोजना तथा विराटनगर महानगरपालिकाको सहयोगमा कार्यक्रम गरिएको थियो । ‘नशा बिना पनि सुन्दर छ जीवन’ नारा सहित कार्यक्रम गरिएको थियो ।