काठमडौं – सोलुखुम्बुस्थित लुक्ला विमानस्थलमा समिट एयरको विमान मनाङ एयरको हेलिकप्टरसँग ठोक्किएर भएको दुर्घटनामा मृत्यु हुनेको संख्या तीन पुगेको छ ।

दुर्घटनास्थलबाट प्रहरी इन्स्पेक्टर प्रदीप सुवेदीले जनाए अनुसार विमानका को–पाइलट सुजित ढुंगाना र विमानस्थलमा ड्यूटीमा रहेका प्रहरी सहायक निरीक्षक रामबहादुर खड्काको घटनास्थलमै मृत्यु भएको हो ।

ड्युटीमै रहेका अर्का प्रहरी रुद्रबहादुर श्रेष्ठको उपचारका क्रममा काठमाडौंमा मृत्यु भएको प्रहरी प्रधान कार्यालयले पुष्टि गरेको छ ।

श्रेष्ठसँगै सिम्रिक एयरको हेलिकप्टरमा काठमाडौं ल्याइएका विमान पाइलट रविनाथ रोकाया र मनाङ एयरको हेलिकप्टरका पाइलट चेतबहादुर गुरुङको उपचार भइरहेको छ ।

गुरुङलाई मनाङ एयरकै हेलिकप्टरमा काठमाडौं ल्याइएको थियो ।

आइतवार बिहान ९ बजे १० मिनेट जाँदा रामेछापका लागि उड्न लागेको विमान धावन मार्गबाट चिप्लिएर हेलिकप्टरमा ठोक्किन पुगेको थियो ।

त्यसक्रममा विमानले ड्यूटीमा रहेका प्रहरीलाई पनि ठक्कर दिएको थियो ।

एक्कासि दायाँ ठोक्किएपछि ड्याङ्ङ आवाज आयो : प्रत्यक्षदर्शी

मेरो नाम नारायणबहादुर राई हो । म खुम्बु पासाङल्हामु गाउँपालिका वडा नम्बर २ को वडा सदस्य हुँ । लुक्ला विमानस्थल हाम्रै वडामा पर्छ ।

म खुम्बु किराँत संस्थाको अध्यक्ष पनि छु । संस्थामा हामीले मासिक रकम जम्मा गर्छौं । संस्थामा रकम जम्मा गरेपछि हामी ३ जना बाहिर निस्कियौं ।

विमान उड्नै लागेको रहेछ । विमान उड्न लाग्यो भनेर हामी हेरिरहेका थियौं ।

तलतिर जानुपर्ने विमान सिधै दायाँतिर मोडियो । एकैछिनमा ड्याङ्ङ आवाज आयो । धुवाँ आउन थाल्यो ।

हामी कुदेर दुर्घटनास्थलतर्फ गयौं । दुई जनाको मृत्यु भइसकेको रहेछ । 

घाइतेहरूलाई उद्धार गरी काठमाडौं पठाइयो । उता लगिएका एक जनाको मृत्यु भएको खबर भर्खर आइपुग्यो ।

चेतबहादुर सर (हेलिकप्टरका पाइलट चेतबहादुर गुरुङ) र विमानका पाइलटको उपचार भइरहेको सुनेका छौं ।

मेरो विचारमा अगाडिको चक्कामा ब्रेक लागेको हुनुपर्छ, नत्र विमान एक्कासि दायाँतर्फ कसरी मोडिन्छ त !