दाङ- राप्ती लोकमार्गअन्तर्गत तुलसीपुर–सल्यान खण्डमा दैनिक ९ घण्टा सडक अवरुद्ध हुने भएको छ ।

राम्री घुम्तीमा तेइस विद्यार्थीको मृत्यु भएकाले त्यसलाई विस्तार गर्न  तुलसीपुर उपमहानगरपालिका–३ को उक्त स्थानमा शनिवारदेखि वैशाख २५ गतेसम्म दैनिक ९ घण्टा सडक बन्द गर्ने सहमति भएको तुलसीपुर ट्राफिक प्रहरी कार्यालयका प्रमुख चन्द्र केसीले बताए । 

उनका अनुसार बिहान ११ बजेदेखि ४ बजेसम्म र राति १ बजेदेखि बिहान ५ बजेसम्म सडक बन्द गरेर काम गर्ने सहमति भएको हो । सडक विस्तार गर्ने स्थल साँघुरो हुँदा बन्द गरेरै काम शुरू गर्न लागिएको हो । अब दैनिक १५ घण्टा राम्री मोड हटाउन कार्य हुनेछ । त्यस स्थानमा पटक–पटक गरी चारवटा सवारी साधन दुर्घटना भएको छानबिन समितिले निष्कर्ष निकालेपछि घुम्ती विस्तार गर्न लागिएको हो ।

सडक डिभिजन कार्यालयले घुम्ती विस्तार गर्नका लागि उज्ज्वल निर्माण सेवासँग सम्झौता गरेको छ । भ्याटसहित ५६ लाख रुपैयाँको लागतमा चालू आर्थिक वर्षको असारभित्र सक्ने गरी निर्माण शुरू गरिएको उक्त कार्यालयका इञ्जिनीयर लिलाबहादुर भण्डारीले बताए । उनका अनुसार चैत २९ गतेदेखि काम शुरू भएको र असार २५ गतेभित्र सक्ने गरी सम्झौता भएको हो । त्यहाँको घुम्ती काट्नाका साथै खाल्डाखुल्डी पुर्ने र पर्खाल लगाइने छ । 

निर्माण कम्पनीका दीपक न्यौपानेका अनुसार दैनिक १५ घण्टा यही गतिमा काम गरे १० दिनमै पूरा हुने बताए । 'उपकरणले  साथ दियो भने हामीले हप्ता-दश दिनमा काम पूरा गर्छौं,' उनले भने, 'त्यसका लागि हामीले कामलाई तीव्रता दिएका छौं ।'