भीमदत्तनगर – कञ्चनपुरको महाकाली अञ्चल अस्पतालबाट विपन्न र असहायलाई वितरण गरिने निःशुल्क औषधि अभाव भएको छ । 

औषधि अभाव हुँदा दैनिकजसो बिरामी रित्तोहात फर्किन बाध्य छन् । बजेट अभावका कारण औषधि खरीदमा समस्या भएपछि लक्षित वर्गलाई औषधि वितरण बन्द गरिएको महाकाली अञ्चल अस्पताल प्रशासनले जनाएको छ ।

अञ्चल अस्पतालभित्र रहेको सामाजिक सेवा केन्द्र एकाइमार्फत् गरीब, असहाय, अपांगता भएका व्यक्ति, ज्येष्ठ नागरिक, महिला स्वास्थ्य स्वयंसेविका, शहीद परिवारलगायतलाई निःशुल्क औषधि दिँदै आइरहेको थियो । ४ दिनअघि अस्पतालले सूचना जारी गर्दै बजेट अभावका कारण औषधि र आंशिक छुट दिन नसक्ने बताएको छ ।

महाकाली अञ्चल अस्पतालका सूचना अधिकृत केशवदत्त अवस्थीले औषधिका लागि संघीय सरकारबाट चालू आर्थिक वर्षमा ३ लाख मात्रै आएको जानकारी दिए । ‘माथिबाट आएको ३ लाखको औषधि सकिएपछि यहाँ समस्या भयो,’ सूचना अधिकृत अवस्थीले भने, ‘औषधि उपलब्ध गराउनका लागि सुदूरपश्चिम प्रदेश सरकारमा पहल गरिरहेका छौं ।’

‘औषधि बिक्रेताले उधारो धेरै भएपछि औषधि दिन नसक्ने भनेपछि सूचना जारी गरेर सेवा मात्रै दिने भनेका हौं,’ अवस्थीले भने, ‘औषधि आएपछि पुनः वितरण शुरू हुन्छ ।’

औषधि पाउन छाडेपछि दैनिक २० देखि ३० जना लक्षित वर्गका बिरामी मारमा परिरहेका छन् । एकाइमा ४ जना कर्मचारी कार्यरत रहे पनि दरबन्दी भने २ जनाको मात्रै हो । अहिले २ जनाको तलब ४ जनाले बाँडेर खाइरहेका छन् । दातृ निकायमार्फत् सामाजिक एकाइ कर्मचारी व्यवस्थापन हुने गरेको छ ।