काठमाडौं – क्रिकेट विश्वकपमा मंगलवार इंग्ल्यान्ड र अस्ट्रेलियाबीच भिडन्त हुँदैछ । 

श्रीलंकाविरुद्धको खेल हारेपछि इंग्ल्यान्डको आत्मविश्वास खस्किएको छ । त्यसमाथि ब्याट्स्म्यान जेसन रोय घाइते भएर खेल्न नसक्ने स्थितिमा पुगेका छन् । 

उता अस्ट्रेलिया चाहिँ भारतसँग हारेपछि लगातार खेल जित्दै उच्च आत्मविश्वासका साथ मैदानमा ओर्लदैँछ ।

विश्वकपअघिको अभ्यास खेलमा अस्ट्रेलियाले इंग्ल्यान्डले हराएको थियो । अस्ट्रेलियाको सबल पक्ष भनेको विपक्षीहरूको मजबूती र कमजोरी हेरेर खेल रणनीति बनाउने हो । 

इंग्ल्यान्डका खतरनाक बलर जोफ्रा आर्चरले अस्ट्रेलियाको बिग ब्याश लीगमा खेलिसकेका छन् । त्यसैले अस्ट्रेलियाका प्रशिक्षक जस्टिन ल्यांगरलाई आर्चरविरुद्ध रणनीति बनाउन सुविधा भएको छ । 

अस्ट्रेलियाको टोलीमा सन्तुलन मिलाउन मार्कस स्टोइनिस छन् । उनले पावरहिटिङ गर्नुका साथै स्ट्राइक रोटेसन पनि मिलाएर गर्ने गरेका छन् । अनि बलरका रूपमा स्टोइनिसले राम्रो सीम निकाल्ने र स्लोअर बलमा विविधता ल्याउने गरेका छन् । 

इंग्ल्यान्ड विरुद्धको अभ्यास खेलमा नाथन लियोन र जेसन बेरेनडोर्फले राम्रो प्रदर्शन गरेकाले उनीहरूलाई आजको खेलमा समावेश गर्न सकिन्छ । 

लर्ड्सको मैदानमा हुने खेलमा ब्याट्स्म्यान र बलर दुवैका लागि राम्रो सुविधा छ । अनि लन्डनको तापक्रम न्यानो रहनेछ र फाटफुट वर्षा हुने सम्भावना छ । टस जित्ने टीमले पहिले बलिङ गर्न सक्छ । 

इंग्ल्यान्डले ब्याटिङ गर्ने हो कि हिटिङ मात्र गर्ने हो भनी निश्चित गर्न सकेको छैन । उसले विगत दुई वर्षमा फरक किसिमको ब्याटिङ रणनीति अपनाएको छ । दबाबमा पर्नेबित्तिकै आक्रामक खेल देखाउने रणनीति उसले अंगीकार गरेको देखिन्छ । 

तर विश्वकपमा उसको प्लानले घाटा गरिरहेको छ । त्यसले गर्दा एक खेलमा ३९७ रन बनाउने इंग्ल्यान्डले श्रीलंका जस्तो कमजोर टोलीविरुद्ध २३३ रन पनि चेज गर्न सकेन ।

अस्ट्रेलिया जस्तो बलियो टोलीविरुद्ध सानो गल्तीले पनि इंग्ल्यान्डलाई डुबाइदिन सक्छ ।

एजेन्सी