काठमाडौं – फेसबूकमा स्टोर्म एरिया ५१, दे कान्ट स्टप अल अफ अस (क्षेत्र नं ५१ जाऔं, उनीहरूले हामी सबैलाई रोक्न सक्दैनन्) नामक इभेन्ट भाइरल बनिरहेको छ । 

साढे ७ लाखभन्दा बढी मानिसले अमेरिकाको नेभाडा राज्यमा रहेको मरुभूमिमा रहेको एरिया ५१ पुग्ने भनी साइन अप गरेका छन् भने ६ लाख ७७ हजारजनाले यसमा चासो देखाएका छन् । 

यो इभेन्टका जन्मदाताले यस्तो योजना बनाएका छन्, ‘हामीहरू सबै एरिया ५१ एलियन सेन्टर नामक पर्यटक आकर्षणको केन्द्रमा भेटेर त्यहाँ प्रवेश गर्नेछौं । हामीले नारुतो रन गरेर कुद्ने हो भने उनीहरूको गोली लाग्ने छैन । हामीहरू एलियन हेरौं ।’

नारुतो भनेको जापानी एनिमे अर्थात् कार्टूनको प्रमुख पात्र हो । कार्टूनमा नारुतोले ढाड झुकाएर कुदेको देख्न पाइन्छ ।त्यसैगरी एलियन हेर्न जानेहरू सेनाको गोली छल्नका लागि झुकेर दौडिने योजना बनाइरहेका छन् । 

एरिया ५१ अमेरिकी सेनाको नियन्त्रण रहेको क्षेत्र हो । यो नेभाडा राज्यको तोनोपाहबाट ३० माइल दक्षिणपूर्वमा पर्छ । 

अमेरिकी सेनाले यहाँ आणविक हतियारको परीक्षण गर्छ अनि आणविक हतियार बोक्ने प्रणालीको अनुसन्धान, परीक्षण र विकास गर्छ । यहाँ अमेरिकी सेनाले तालिम पनि गराउने गरेको छ ।

षड्यन्त्र सिद्धान्तमा विश्वास गर्नेहरूले त्यहाँ अर्कै ग्रहका प्राणी एलियनलाई अमेरिकी सेनाले लुकाएर राख्ने गरेको ठान्छन् । त्यसैले अहिले केही मानिस त्यहाँ जानका लागि हत्ते गर्दैछन् । 

तर एरिया ५१ जाने कुरा हल्ला मात्र हो, एउटा मजाक हो । यो एक फेक इभेन्ट हो । तर यसमाथि निकै धेरै मिमहरू बनिरहेका छन् ।

एजेन्सी