काठमाडौं – संसदको बैठकमा कम उपस्थित हुने र संसदीय समितिको बैठकमा उपस्थित नहुने आरोप लागेका प्रमुख प्रतिपक्षी दल नेपाली कांग्रेसका सभापति शेरबहादुर देउवा संसदीय समितिमा उपस्थित भएका छन् ।

प्रतिनिधि सभाको विकास र प्रविधि समितिको मंगलवार बसेको बैठकमा देउवा उपस्थित भएका हुन् ।

विज्ञापन नियमन सम्बन्धी व्यवस्था गर्न बनेको विधेयकबारे विज्ञसँग छलफल गर्ने कार्यसूची रहेको मंगलवारको बैठकमा देउवासँगै नेकपाका वरिष्ठ नेता झलनाथ खनाल पनि उपस्थित छन् । शीर्ष नेतामध्ये पूर्व प्रधानमन्त्री खनाल संसदीय समितिमा धेरै उपस्थित हुने नेतामा पर्छन् ।

मंगलवारको बैठकमा काशीराज दाहाल लगायतका विज्ञ उपस्थित छन् । 

पछिल्लो पटक संसद सचिवालयले असार ३० गते संसद सचिवालयले संसद र समितिका बैठकमा उपस्थित हुन सबै सांसदलाई एसएमएसमार्फत जानकारी गराएको थियो । सबै सांसदलाई पठाइएको सूचनामा संसद बैठकमा लगातार १० पटक अनुपस्थित भएमा सांसद पद जाने तथा समितिका बैठकमा लगातार ५ पटक अनुपस्थित भएमा समितिको सदस्य नरहने संविधान र नियमावलीको व्यवस्थाबारे सूचित गरिएको थियो ।