काठमाडौं – दुई वर्षअघि अमेरिकाको दक्षिण एसियाली नीतिलाई केन्द्रविन्दु बताउने ट्रम्प प्रशासनले अहिले आएर चाहिँ पाकिस्तानतर्फ झुकाव बढाइरहेको देखिन्छ । 

अर्को वर्षको राष्ट्रपति चुनावलाई ध्यानमा राख्दै डोनल्ड ट्रम्पले सेप्टेम्बरसम्ममा अफगानिस्तानबाट आफ्नो सैनिक फिर्ता बोलाउने फैसलामा अडान देखाएको छ । युद्धग्रस्त अफगानिस्तानमा आफ्नो हितको रक्षाका लागि अमेरिका अब पाकिस्तानमा निर्भर भएको छ । 

पाकिस्तानका प्रधानमन्त्री इमरान खानले अफगानिस्तानमा १८ वर्षदेखि जारी युद्ध अन्त्य गर्नका लागि राजनीतिक सम्झौता गराउन सक्ने ट्रम्पले बताएका छन् । पाकिस्तानलाई प्रत्येक वर्ष १.३ अर्ब डलरको सहायता रकम पुनर्बहाली गर्ने सम्भावना पनि उनले देखाएका छन् । पोहोर साल यसमा रोक लगाइएको थियो ।

यी सबै घटनाक्रमको असर धेरै हदसम्म ट्रम्पले अपनाउने भारत–पाकिस्तानप्रतिको नीतिमा पर्न सक्छ । नियन्त्रण रेखामा तनाव कम हुने कुराले अफगानिस्तानमा समर्थनको कुरालाई निर्धारित गर्ने इमरानले ट्रम्पलाई बताएका छन् ।

ह्वाइट हाउसमा इमरान खानसँग सोमवार भएको बैठकमा ट्रम्पले भने, ‘पाकिस्तानले अमेरिकालाई अफगानिस्तानबाट निस्कन सहायता गर्छ जस्तो लाग्छ ।’

ट्रम्पको यो बयान एक वर्षअघिको उनको सोचभन्दा फरक छ । उनले पोहोर साल एक ट्वीट गरेर पाकिस्तानले आफूलाई झूट र धोका बाहेक केही पनि नदिएको लेखेका थिए । पाकिस्तान आतंकवादीहरूको सुरक्षित शरणस्थल बनेको पनि उनले लेखे । 

त्यसपछि वाशिङटनले पुलवामा आक्रमणपछि मसूद अजहरलाई वैश्विक आतंकवादी घोषणा गराउन नयाँ दिल्लीको सहायता गरेको थियो यसबाट पाकिस्तानविरुद्ध भारतको प्रयास बलियो बनेको थियो ।

तर अहिले अमेरिका पाकिस्तानसँगको सम्बन्धलाई नयाँ आयाम दिन तयार देखिन्छ । ट्रम्पले सोमवार भने, ‘हामीले विगत केही हप्तामा राम्रो प्रगति गरेका छौं । अमेरिकाको पक्षमा अनेकौं घटनाक्रम विकसित भइरहेको छ र इमरानको नेतृत्वमा पाकिस्तानमा पनि राम्रो प्रगति भइरहेको छ ।’

ट्रम्पले अफगानिस्तानबाट अमेरिकी बहिर्गमनका लागि पाकिस्तानको महत्त्वपूर्ण भूमिका रहेको बताएपछि इमरान खान निकै हर्षित छन् । इस्लामाबादले सोमवार ट्रम्पले तालिबानसँगको शान्तिवार्तामा आफूले गरेको योगदानको सराहना गरेको र खानले यस प्रक्रियामा अघि बढ्न सहायता गर्ने आश्वासन दोहोर्‍यायो ।

अफगानिस्तानमा पाकिस्तानको ठूलो भूमिकाको असर भारत र अमेरिकाको सम्बन्धमा पर्न सक्छ ।

एजेन्सी