काठमाडौं – अमेरिकाका राष्ट्रपति डोनल्ड ट्रम्पले पाकिस्तानका प्रधानमन्त्री इमरान खानलाई फोन गरेर भारतका विरुद्ध ‘नरम भाषा’ प्रयोग गर्न सुझाव दिएका छन् । जम्मु तथा कश्मीरका विषयमा भारतसँगको तनाव घटाउन उनले यस्तो सुझाव दिएका हुन् । 

ट्रम्पले एक हप्ताभन्दा कम समयमा दोस्रोपटक खानलाई फोन गरेका हुन् । उनले भारतका प्रधानमन्त्री नरेन्द्र मोदीसँग आधी घन्टा संवाद गरेलगत्तै इमरान खानलाई फोन गरेका हुन् । मोदीले ट्रम्पलाई पाकिस्तानका नेताहरू ‘कठोर भाषा उपयोग गरिरहेको र भारतविरुद्ध हिंसा भड्काइरहेको’ गुनासो गरेका थिए । 

इमरान खानसँगको कुराकानीमा ट्रम्पले तनाव नचर्काउने आवश्यकतामा जोड दिँदै दुवै पक्षलाई संयम अपनाउन भनेको ह्वाइट हाउसले जनायो । 

दुई नेताले अमेरिका र पाकिस्तानबीचको आर्थिक तथा व्यापारिक साझेदारी बलियो बनाउनलाई काम गर्ने सहमति पनि जनाएका छन् । 

ट्रम्पले लगत्तै ट्वीट गर्दै लेखे, ‘मेरा दुई असल साथी भारतका प्रधानमन्त्री मोदी र पाकिस्तानका प्रधानमन्त्री खानसँग व्यापार, रणनीतिक साझेदारी र सबभन्दा महत्त्वपूर्ण कश्मीरमा तनाव घटाउने कुरा गरें ।’

कश्मीरका विषयमा खानले भारतविरुद्ध लगातार विषवमन गरिरहेका छन् । आइतवार उनले भारतीय सरकार फासिस्ट र हिन्दू सर्वोच्चतावादी भएको आरोप लगाउँदै यो पाकिस्तानमाथि र भारतका अल्पसंख्यकमाथि नै जोखिमका रूपमा रहेको बताएका थिए ।

भारतले जम्मु तथा कश्मीरलाई विशेष दर्जा दिने धारा ३७० खारेज गर्दै उक्त राज्यलाई केन्द्रशासित प्रदेश बनाउने घोषणा गरेपछि पाकिस्तानबाट कठोर प्रतिक्रिया आएको छ ।

एजेन्सी