चालक नपाएर थन्कियो सडक सफा गर्न करोड खर्चिएर किनेको 'ब्रूमर'

भदौ ६, २०७६

जनकपुरधाम – जनकपुरधाम उपमहानगरपालिकाले करोडभन्दा बढी रकम खर्च गरेर सडक सफा गर्नका लागि ब्रूमर किनेको भएपनि हालसम्म प्रयोगमा आउन सकेको छैन ।

फोहोर शहरको रुपमा जनकपुरधाम बदनाम भएपछि सडकमा रहेको धुलो सफा गर्नका लागि गत आर्थिक वर्षमा उपमहानगरले ब्रूमर किनेको थियो ।


ADVERTISEMENT

उपमहानगरका वरिष्ठ इन्जिनियर वीरेन्द्र यादवले १ करोड ३५ लाख ५० हजार रुपैयाँमा ब्रूमर किनिएको बताए । धनुषा निर्वाचन क्षेत्र नम्बर ३ का प्रतिनिधि सभाका सदस्य राजेन्द्र महतोले स्थानीय पूर्वाधार विकास साझेदारी कार्यक्रमको रकमबाट जनकपुरधाम उपमहानगरलाई ब्रूमर किन्न १ करोड रुपैयाँ प्रदान गरेका थिए । बाँकी ३४ लाख ५० हजार रुपैयाँ उपमहानगरले आफैं तिरेको थियो ।

ब्रूमर चलाउनका लागि तालिम प्राप्त चालक नभएकाले ब्रूमर सञ्चालनमा आउन नसकेको उपमहानगर कार्यालयका वरिष्ठ इन्जिनियर यादवले बताए । ‘हुन त पहिलेदेखि नै ड्राइभरको कमी छ, त्यसमा पनि भएको ड्राइभरलाई ब्रूमर चलाउन आउँदैन,’ उनले भने, ‘कम्तिमा पनि १ हप्ताजतिको तालिम दिएपछि मात्र भएकै ड्राइभरले पनि ब्रूमर चलाउन सक्छन् ।’

‘अहिले वर्षात्को समय भएकाले पनि तालिम दिइएको छैन । अब जतिसक्दो चाँडो तालिम दिएर ब्रूमर सञ्चालनमा ल्याउने उपमहानगरको सोच रहेको छ,’ उनले भने ।

सडक विभागको मेकानिकल इन्जिनियरलाई बोलाएर स्पेसिफिकेसन तथा इस्टिमेट गराएर ई–बिडिङमार्फत ब्रूमर खरिद गरिएको इन्जिनियर यादवले जानकारी दिए । ब्रूमर खरिद गरेर आपूर्तिकर्ताले आपूर्ति गराएपनि मेकानिकल इन्जिनियरबाट जाँच पास गराएर मात्र ब्रूमरको भुक्तानी गरिएको यादव बताउँछन् ।

उपमहानगरको जिन्सी शाखाका प्रमुख गणेश यादवले सयपत्री नेपाल इन्टरनेसनल प्रालि काठमाडौंले २०७६ जेठ १६ गते ब्रूमर खरिद गरेर आपूर्ति गरेको बताए । २०७६ साउन १५ गते ना८ख ४३९९ नम्बरको ब्रूमर जनकपुर उपमहानगरको कार्यालयमा आएपछि प्रदेश २–०२–००–१ ग ००११ नम्बरको नम्बर प्लेट अनुसार उपमहानगरको नाममा नामसारी समेत भइसकेको जिन्सी प्रमुख यादवले बताए तर ब्रूमरको नम्बर प्लेट हालसम्म पुरानै रहेको छ, परिवर्तन गरिएको छैन ।

ब्रूमरमा छुट्टै पानी ट्यांकर, सडक सफा गर्नेदेखि बालुवा, गिट्टी, ढुंगा, इँटा समेत तान्ने, हावा प्रेसर भएको तथा सीसीटीभी क्यामेरा समेत जडान गरिएको छ । सबै कुरा स्वीचमार्फत नै सञ्चालन हुने भएकाले ब्रूमर चलाउन जान्ने चालक नपाइएको उनले बताए ।

बु्रमर किनिएको भएपनि सञ्चालनमा नआउँदा सडकमा रहेको बालुवा तथा धुलो, फोहोर सफा नभएपछि शहरको सडक फोहोरमय नै छ । उपमहानगरका सफाइकर्मीले शहरको सडक सफा गरेर ट्रयाक्टरमार्फत फोहोर उठाउने गरेको भएपनि प्रभावकारी हुन सकेको छैन ।

भदौ ६, २०७६ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस