महरा पक्राउपछि पूर्व माओवादी नेताको टिप्पणी– सम्पत्ति, यौन र सत्ताबारे दृष्टिकोणकै समीक्षा जरुरी

असोज २०, २०७६

काठमाडौं– माओवादीको सशस्त्र जनयुद्ध लडेका प्रभावशाली नेता एवं निवर्तमान सभामुख कृष्णबहादुर महराको पक्राउले पूर्व माओवादी वृत्तमा हलचल ल्याइदिएको छ ।

संसद् सचिवालयमा कार्यतर महिलामाथि जबरजस्तीको प्रयास गरेको आरोपमा महरालाई आइतवार प्रहरीले नियन्णत्रमा लिएको थियो । 


ADVERTISEMENT

माओवादी आन्दोलनमा लागेका शीर्ष तहका नेता एवं पटक–पटक सत्तामा पुगेका महरा पक्राउप्रति पूर्व माओवादीका मध्यम तहका नेता र कार्यकर्ताले सामाजिक सञ्जालमार्फत क्रिया/प्रतिक्रिया जनाइरहेका छन् । 

नेकपा स्थायी समिति सदस्य एवं पूर्व माओवादी नेता मणि थापाले महरा गिरफ्तारीको समस्या व्यक्तिमा खोज्ने भन्दापनि परिवार, निजी सम्पत्ति, यौन र सत्तालाई बुझ्ने दृष्टिकोणकै समीक्षा जरुरी रहेको टिप्पणी गरेका छन् । 

‘क्षति ठूलो भयो, तर यसलाई व्यक्तिमा मात्र खोजिनुहुँदैन । मुख्यतः परिवार, निजी सम्पत्ति, यौन र सत्तालाई बुझ्ने हाम्रो दृष्टिकोणकै समीक्षा हुनु जरुरी छ,’ थापाले आइतवार अबेर सामाजिक सञ्जाल फेसबूकमा लेखेका छन् ।

महरा सञ्चार मन्त्री रहेको समयमा उनका प्रेस सल्लाहकार समेत रहेका विश्लेषक नरेन्द्रजंग पिटरले महरा पक्राउअघि नै सामाजिक सञ्जालमा स्टाटस लेख्दै महराले अक्षम्य गल्ती गरेकाले उनको सती जान नपर्ने टिप्पणी गरेका थिए ।

‘महराले अक्षम्य गल्ती गरे, त्यस्को परिणाम उनै भोग्दैछन्, कोही सती जानै पर्दैन । तर, उनलाई त्यस्ले मात्र आक्रमण गरोस् जस्का मन, मस्तिक, सोच कल्पना र अभ्यासमा कहिल्यै पनि यौन बिचलन भने नहोस ।

शिशा घरवालाले अर्काको घरमा भने कहिल्यै ढुंगा हान्दैन । हे, ब्रमाचार्यज्यू, साध्वीज्यू हेक्का राख्नुस्,’ उनले लेखेका छन् । 

महरा प्रकरणमा समाजवादी पार्टीका नेता एवं पूर्व प्रधानमन्त्री बाबुराम भट्टराईले महरालाई खुला पत्र लेखेरै कारवाहीको भागीदार बन्नुपर्ने बताएका थिए । 

असोज २०, २०७६ मा प्रकाशित

प्रतिक्रिया दिनुहोस