काठमाडौं – फेसबूकले प्रयोगकर्ताहरूको अकाउन्ट भेरिफिकेसन गर्नका लागि भिडियो सेल्फी लिने व्यवस्थाको गोप्य परीक्षण गरिरहेको छ । अकाउन्ट खोल्ने मानिस वास्तविक व्यक्ति हो भन्ने पत्ता लगाउन भिडियो सेल्फीको व्यवस्था ल्याउन लागिएको हो । 

यस व्यवस्था अन्तर्गत प्रयोगकर्ताहरूले मोबाइल फोनको क्यामरा अन गरेर आँखाको लेभलमा राख्नुपर्ने अनि स्क्रीनमा देखिएको गोलाकार फ्रेममा अनुहार फिट गर्नुपर्नेछ ।

उनीहरूलाई सीधा अगाडि हेर्न लगाइनेछ, त्यसपछि दाहिनेतिर, अनि देब्रेतिर अनि फेरि सीधा अगाडि हेरेर भिडियो सेल्फी लिन लगाइनेछ । 

‘यसले हामीलाई तपाईंको पहिचान पुष्टि गर्न मद्दत गर्नेछ र तपाईं वास्तविक व्यक्ति भएको परीक्षण गर्नेछ,’ फेसबूकले यापको सन्देशको शुरूमा भन्नेछ । 

यापले सेल्फी भिडियो कोही अन्य व्यक्तिले देख्न नसक्ने प्रतिज्ञा गरेको छ तर कसले चाहिँ हेर्न पाउने हो भन्ने पनि स्पष्ट तोकेको छैन । 

प्रयोगकर्ताको पहिचान पुष्टि भएको ३० दिनपछि भिडियो स्वतः डिलिट हुने फेसबूकले बताएको फास्ट कम्पनीको एक रिपोर्टमा उल्लेख गरिएको छ । 

फेसबूकले यो परीक्षणको कुनै पनि विवरणको सार्वजनिक घोषणा गरेको छैन ।

प्रयोगकर्ताहरूको बायोमेट्रिक डाटालाई गोप्य नराखेको भनी यसअघि फेसबूकको निकै आलोचना गरिएको थियो ।

एजेन्सी