गत साउनमा बसेको नेपाल कम्युनिस्ट पार्टी (नेकपा) कर्णाली प्रदेशसभा संसदीय दलको बैठक ६ महिनापछि शनिवार बिहान ९ बजेदेखि शुरू भएको छ ।

जताततै सरकारको आलोचना हुन थालेको, प्रदेशसभा सदस्य तथा सरकारका मन्त्रीले मनलाग्दी बोल्ने गरेको गुनासो सर्वत्र फैलिएपछि नेकपाले संसदीय दलको बैठक बोलाएको हो ।

माघ २४ गते प्रदेश सभाको पाँचौ अधिवेशनमा नेकपाका शक्तिशाली नेता यामलाल कँडेलले सरकारले सदन र संसदीय दललाई विश्वासमा लिन नसकेको भन्दै कडा आलोचना गरेका थिए । कँडेलबाहेक अन्य प्रदेशसभा सदस्यले सञ्चारमाध्यम तथा सार्वजनिक कार्यक्रममार्फत भएपनि सरकारको आलोचना गर्दै आइरहेका थिए ।

सार्वजनिक आलोचना बढेपछि नेकपा संसदीय दलको बैठक बोलाउन मुख्यमन्त्री तथा दलका नेता महेन्द्रबहादुर शाही बाध्य भएका एक प्रदेशसभा सदस्यले दाबी गरे ।

शनिवार दिउँसोसम्म सरकारका मन्त्रीले प्रगति विवरण राख्ने काम सम्पन्न गरेका छन् भने ८ जना प्रदेशसभा सदस्यले धारणा राखेका स्रोतले जनाएको छ । ‘दलको बैठकमा भाग लिने सदस्यहरूमा सरकारको काम कारवाहीप्रति सन्तुष्टि देखिएन । सरकार आफ्नै दलको भएपनि सदस्यहरूलाई साथमा लिन नसकेको, प्रतिपक्षीलाई बढी प्राथमिकता दिने गरेको वा सार्वजनिक विरोध गर्ने अवसर दिने काममा सफल भएको, योजनामा प्रदेशसभा सदस्यलाई जानकारी नै नदिई मनोमानी तरिकाले सरकारले कार्यविधिका नाममा फेरबदल तथा रोक्का गर्ने गरेको आरोप लगाउँदै छलफल भएको छ,’ एक सदस्यले भने, ‘यसरी सरकार कसरी चल्छ ? सरकारलाई हामीले नै काम गर भनेर भनेका होइनौं र ? कम्तिमा हामी सदस्यहरूको भावनाको कदर कहिले गर्ने ? कति विरोध गर्ने ?’

लामो समयसम्म संसदीय दलको बैठक नबोलाएको र सरकार सञ्चालनमा सांसदसँग समन्वय नगरेको भन्दै आलोचनाको केन्द्रमा मुख्यमन्त्री शाही रहेका छन् । छलफलमा भाग लिएका अर्का सदस्यले सरकारले सोचे अनुसारको काम गर्न नसकेको कुरा छलफलमा उठेको बताए ।

‘सरकारले कर्मचारी भर्ना गरेको छ । हरेक जिल्लामा कार्यालय स्थापना पनि गरेको छ । के कारणले पूँजीगत खर्च गर्न सरकारले सकेन ? हामीलाई चित्त बुझ्दो जवाफ चाहियो,’ बैठकमा कडा रुपमा बैठकमा प्रस्तुत भएका प्रदेश सभा सदस्यले भने, ‘हामी हाम्रो सरकारले यसो गरेको छ, उसो गरेको छ भनेर बाहिर प्रचार गर्ने तर सरकार हामीलाई नै बाइपास गरेर अघि बढ्न खोज्ने ? यो कस्तो चलन हो ? यसरी कति दिन चल्छ ? हामीले जनतालाई के जवाफ दिने ?’

नेकपा संसदीय दलका सचेतक सीता नेपालीले सरकारको कामको समीक्षा भइरहेको लोकान्तरलाई बताइन् । ‘नेकपाको सरकार भएको र हाम्रै साथीहरू सरकारमा भएका कारण सरकारको काम कारवाहीको समीक्षा भइरहेको छ,’ उनले भनिन्, ‘सरकारका मन्त्रीले आफूले गरेको काम कारवाहीको प्रगति विवरण राखिसक्नुभएको छ । प्रदेशसभा सदस्यले राख्ने क्रम जारी छ ।’