सुर्खेतको पश्चिममा पर्ने बराहताल गाउँपालिकाको बड्डीचौरमा ड्राइभर माथि ट्राफिक प्रहरीले घुस्सा बर्साएको छ ।

कर्णाली करिडोर निर्माण गरिरहेको नेपाली सेनाका लागि आइतबार विभिन्न सामाग्री मिनि ट्रकमार्फत हुम्लातर्फ गइरहेका चालक दिपक प्रसाद पोखरेलमाथि पाँच सय नदिंदा प्रहरीले घुस्सा बर्साएको चालक पोखरेलले बताए ।

‘कर्णाली प्रदेश ०२–००१ख००६९ नम्बरको  मिनि ट्रक चलाएर गइरहेको थिएँ । म सँग प्रहरीले ब्लुबुक माग गर्यो । मैले दिएँ,’ उनले भने, ‘एक क्विन्टल सामान बढि छ भन्दा ट्राफिक प्रहरी योगेन्द्र रानाले मलाई बिल बुक फिर्ता दिए र त्यो भित्र मलाई पाँच सय रुपैंया राख्न भने ।’

तर आफूले उक्त रुपैंया दिन नमानेपछि पहिले अपशब्द बोल्दै प्रहरीले गाली गरेको र पछाडीबाट आई आफूमाथि आक्रमण गरेको उनको भनाई छ ।

हाल जिल्ला प्रशासन कार्यालय सुर्खेतमा खबर भइसकेको र सदरमुकामबाट टोली नआउँदा र छलफल नहुँदासम्म यातायात अवरुद्ध पारिएको पोखरेलले जानकारी दिए । उनले आफूमाथि सार्वजनिक स्थानमा नै आक्रमण गरिएको भन्दै प्रहरीको यो दादागिरी विरुद्ध अहिले स्थानीय होटल व्यवसायीको साथमा आन्दोलन गर्ने तयारी भइरहेको उनको भनाइ छ ।

यता, जिल्ला ट्राफिक प्रहरी कार्यालयमा प्रहरी निरीक्षक नभएको अवस्थामा कमाण्ड सहायक इन्स्पेक्टर नरेन्द्रबहादुर सिंहले सम्हालेका छन् । उनलाई यो विषयमा सोध्दा आफूलाई घुस मागेको रिर्पोट नभएको दाबी गरे ।

‘चालकले उल्टो तपाईको औकात के हो भन्दै थर्काएपछि विवाद भएको भन्ने सुनेको हुँ,’ उनले भने, ‘यदि त्यसरी घुस नै मागेको र सार्वजनिक स्थानमा हातपात नै गरेको भए कानून अनुसार रानालाई कारवाही हुन्छ ।’