दुईदिने भारत भ्रमणका क्रममा सोमवार अहमदाबाद पुगेका अमेरिकाका राष्ट्रपति डोनल्ड ट्रम्पले मोटेरा स्टेडियममा विशाल जनसमुदायमाझ सम्बोधन गरेका छन् । 

त्यसक्रममा उनले हिन्दू पर्वहरू होलीदेखि दिवालीसम्म अनि स्वामी विवेकानन्ददेखि सरदार पटेलसम्मको कुरा झिकेर भारतीयहरूलाई मक्ख पार्ने कोशिश गरे । 

भारतको प्रशंसा गर्दै ट्रम्पले भारत अहिले ठूलो शक्ति बन्दै उदाएको र यस शताब्दीका लागि यो महत्त्वपूर्ण कुरा भएको बताए । ट्रम्पले मोदी सरकारका उज्ज्वला योजना, इन्टरनेट सुविधा, प्रधानमन्त्री आवास योजना लगायतको उल्लेख गरे । 

ट्रम्पले सम्बोधनका क्रममा सचिन तेन्दुलकर र विराट कोहलीको समेत चर्चा गरे । संसारलाई महान् खेलाडी भारतले दिएको उनले बताए । 

होली र दिवाली जस्ता पर्वले भारतको विविधतालाई झल्काउने उनले बताए । भारतमा हिन्दू, जैन, मुसलमान, सिख समेत अनेकौं धर्मका मानिस बस्ने र दर्जनौं भाषा बोलिने कुरा पनि उनले झिके । 

सम्बोधनका क्रममा ट्रम्पले मोदीको पनि उच्च प्रशंसा गरे । मोदी गुजरातका लागि मात्र नभई देशकै लागि गर्व भएको र उनले असम्भवलाई सम्भव बनाएर देखाएको ट्रम्पले बताए । प्रधानमन्त्री मोदीको अगुवाइमा भारतले प्रगति गरिरहेको र उसको विकासयात्रा संसारमै उदाहरणीय रहेको ट्रम्पको भनाइ छ । 

भारत र अमेरिका रक्षाको क्षेत्रमा सँगै अघि बढिरहेको र भारतलाई अमेरिकाले छिट्टै खतरनाक क्षेप्यास्त्र र हतियार दिने ट्रम्पले बताए । अमेरिका र भारत मिलेर आतंकवादविरुद्ध लड्ने उनको कथन छ । 

अमेरिकामा भारतीय मूलका मानिसले विकासमा ठूलो योगदान गरेको र त्यसका लागि उनीहरू धन्यवादका पात्र भएको ट्रम्पले बताए ।