साझा पार्टीको राष्ट्रिय भेला आजदेखि लुम्बिनीमा शुरू हुँदैछ ।

फागुन १७ गतेसम्म चल्ने भेलामा देशका सातै प्रदेश तथा विदेशस्थित सद्भाव समूहका समेत गरी करीब ५ सय अगुवा सदस्य सहभागी हुनेछन्। 

'साझा पार्टी फरक धार, नयाँ ऊर्जा संगठन र विचार' नारा दिइएको राष्ट्रिय भेलाले पार्टी स्थापनायताको अनुभव, सिकाइ, उपलब्धिहरूलाई रक्षा गर्दै तिनको जगमा अझ अगाडि जाने र आगामी एक वर्षभित्र पार्टीलाई नयाँ राजनीतिक उचाइ दिने गरी रणनीतिक र सांगठनिक कार्ययोजना तय गर्ने साझा पार्टीले जनाएको छ ।

भेलाको पहिलो दिन बिहीवार दिउँसो ३ बजेपछि उद्घाटन शत्र शुरू हुनेछ। आजै साँझ सात बजे केन्द्रीय समितिका सम्पूर्ण सदस्य र भेलाका सबै सहभागी सदस्यहरूले मायादेवी मन्दिरमा शान्ति दीप प्रज्वलन गर्ने कार्यक्रम छ ।

दोस्रो दिन शुक्रवार समूहगत प्रस्तुति र छलफल हुनेछ ।

तेस्रो तथा अन्तिम दिन शनिवार समूहगत छलफलमा उठेका प्रश्नहरूको जवाफ केन्द्रीय नेतृत्वले दिनुका साथै साझा पार्टीको रणनीति र कार्ययोजना पारित गरी लुम्बिनी घोषणापत्र जारी गर्दै भेला समापन हुनेछ ।