कर्णालीको सामाजिक विकास मन्त्रालयले प्रदेशका सबै स्वास्थ्यकर्मीको बिदा रद्द गरेको छ ।

मन्त्रालयले बिदामा रहेका सबै स्वास्थ्यकर्मीलाई तुरुन्त कार्यक्षेत्रमा फर्कन निर्देशन दिएको छ ।

कोरोना भाइरसको संक्रमणबाट बच्न पूर्व सावधानीका क्रममा काजमा रहेका तथा बिदामा बसेका सबै स्वास्थ्य क्षेत्रका कर्मचारीलाई कार्यालय फर्कन निर्देशन दिइएको सामाजिक विकास मन्त्रालयका निमित्त सचिव विष्णुप्रसाद अधिकारीले बताए ।

‘मातहतका कर्मचारीहरूलाई निरन्तर अवस्थाको अपडेटसहित स्वास्थ्य निर्देशनालयमा रिपोर्टिङ गर्न निर्देशन दिएका छौं । यसका अलावा मन्त्रालयले भीडभाड बढी हुने कार्यक्रम सकभर कम गर्न वा निरुत्साहन गर्ने गरी काम अघि बढाउन निर्देशन दिइएको छ,’ उनले भने ।

प्रदेश अस्पताल सुर्खेतमा आइसोलेसन बेडको आवश्यक व्यवस्थापन गर्ने निर्णय समेत गरिएको मन्त्रालयले जनाएको छ ।

मन्त्रालयले चीनसँग सिमाना जोडिएको कर्णाली प्रदेशमा कोरोना भाइरस संक्रमण हुनसक्ने उच्च जोखिम भएको बताउँदै संक्रमणबाट बच्न आवश्यक सावधानी अपनाउने जनाएको छ । 

निमित्त सचिव अधिकारीका अनुसार मन्त्रालयले कर्णाली प्रदेशका प्रवेशद्वार, उच्च जोखिम भएका क्षेत्रमा सडक ब्यानर राख्ने भएको छ । बबई, हर्रे, छिन्चु, गुर्भाकोट, दैलेख, बड्डचौर, विमानस्थल, बसपार्क, हिल्सा लगायतका नाकामा सडक ब्यानर टाँगिने छ । ‘ती व्यानरमा कोरोना रोग कसरी सर्छ, कसरी बच्ने जस्ता उपाय उल्लेख गरिएको हुनेछ,’ उनले भने ।