५ नम्बर प्रदेशका मुख्यमन्त्री शंकर पोखरेलले कोरोना भाइरसबाट जोगिन भीडभाड र घुमफिरमा ननिस्कन प्रदेशबासीलाई आग्रह गरेका छन् ।

कोरोनाबाट जोगिन सतर्कता बढाउन आवश्यक रहेको उनले बताए ।

प्रदेशसभा बैठकमा बिहीवार सम्बोधन गर्दै उनले चीनबाट फैलिएको कोरोना भाइरसले महामारीको रुप लिएको भन्दै त्यसबाट जोगिन कतै घुमफिर र भीडभाडमा नजान आग्रह गरेका छन् ।

‘सम्भावित संकटलाई सामना गर्न क्वारेन्टाइन र आइसोलेसन वार्ड पनि तयार गरिएको छ । आशंकित बिरामीलाई परीक्षणको व्यवस्था गरिएको छ । उच्च ज्वरोलाई आएका व्यक्तिको भन्सार नाकामा मिलाएका छौ । यो बेलामा कतै घुमफिरमा प्रदेशबासी नजाऔं,’ उनले भने ।

चीन बाहिरका अन्य देशमा कोरोनाको संक्रमण तीब्र रुपमा फैलिएको छ । ‘कोरोना संक्रमण फैलिएको बेला पाका उमेरका वृद्धावृद्धालाई तीर्थाटनमा नलैजानुहोस् । व्यक्तिबाट मात्र सर्दैन, उसले प्रयोग गरेका सामग्रीबाट पनि सर्छ । इम्युनिटी पावर कम भएका मानिसमा संक्रमण बढी हुन्छ । रोगलाई खेलवाडको विषय नबनाउँ ।’

प्रदेश नयाँ दिशाबाट अगाडि बढेको उनले बताए । पोखरेलले प्रदेश एक्स्पोले नयाँ सन्देश दिएको दाबी गरे । ‘कम खर्चमा एक्स्पो आयोजना गरियो । १ लाख जनताले अवलोकन गरे,’ उनले भने । प्रदेशका गौरवका आयोजनाको मापदण्ड तयार गरिएको समेत उनले बताए । 

जीवराज आश्रित र कृष्णसेन इच्छुक सडकलाई प्रदेशको गौरवको आयोजना भनिएको र बहुवर्षीय आयोजनाको खर्च पनि बढाउँदै लैजाने मुख्यमन्त्री पोखरेलले बताए ।