बुधवार विहानको दुई बजेको थियो । सुर्खेतका व्यवयासी, सुर्खेत चेम्बर अफ कर्मशका अध्यक्ष चिन्तामणि शर्मा घण्टाघरमा सुतिरहेका थिए । त्यहि बेला उनको मोबाइलमा सरकारी उच्च अधिकारीको फोन आयो ।

तारन्तार फोन आउन थालेपछि उनले फोन उठाए । भारतको रुपैडियाबाट ल्याइएका ५७ जनालाई होटलमा बास दिनुपर्ने प्रस्ताव कर्णाली प्रदेश सरकारका एक मन्त्रीले गरे ।

‘मैले पहिले पनि सामाजिक सञ्जालमार्फत सरकारलाई आवश्यक परेको खण्डमा क्वारेन्टाइन बनाउन होटल दिने प्रतिबद्धता जनाइसकेको थिएँ,’ उनले भने, ‘सरकारले आग्रह गरेपछि मानवियताका नाताले मैले भारतबाट ल्याइएका नागरिकलाई राखने निर्णय गरेको हुँ ।’

जिल्ला प्रहरी कार्यालय सुर्खेतका प्रहरी उपरीक्षक दिल्लीराज पन्तले प्रदेश सरकारले बाँके जिल्ला प्रशासन कार्यालयको सहयोगमा भारतबाट आएका १०२ जना नागरिकलाई जुम्ला रोडमा रहेको अशोका होटलमा राखेको जानकारी दिए ।

‘१२ गते बिहान दुई बजेको समयमा भारतबाट नेपालका विभिन्न नाका हुदै सुर्खेत भित्रिएका पुरुष ५३ र महिला ४ गरी जम्मा ५७ जनालाई क्वारेन्टाइनमा राख्नुपर्ने भएकोले विनपा ६ स्थित खुल्ला मैदानमा क्वारेन्टाइन निर्माणधीन अवस्थामा रहेकोले उनीहरुलाई कर्णाली प्रदेश सरकारको आर्थिक सहयोगमा विनपा १० दैलेखी चोकस्थित रहेको अशोका होटलमा २७ वटा कोठा भाडामा लिई राखिएको छ,’ उनले भने ।

यसका अलावा सोही होटलमा भारतको विभिन्न नाका हुदै आएका थप ४५ जना मध्ये दुई महिला र १९ पुरुष अशोका होटलमा थप गरी जम्मा ७८ जनालाई उक्त होटलमा राखिएको प्रहरीले जनाएको छ ।

अन्तर्र निर्भर समाज होस्टेलको भवनमा २४ जना पुरुष राखिएको छ ।

सामाजिक विकास मन्त्री दल रावलले होटल खोज्दा पनि रातिको समयमा नपाइएका कारण नेपाली सेनाले अशोका होटलमा राखेको बताए । उनले अहिले उक्त होटलमा नेपाली सेना, स्वास्थ्यकर्मीको एक टिम नै खटाइएको बताउँदै विहीबार साँझदेखि होटलमा रहेका नागरिकलाई क्वारेन्टाइनमा सारिने बताए ।

‘नेपाली सेनाले नै खुलामञ्चमा रहेको क्वारेन्टाइनको व्यवस्थापन गरिरहेको छ । बिहीवारसम्म क्वारेन्टाइन पूर्ण रुपमा तयार हुन्छ । सेनाले सबैलाई त्यहीं व्यवस्थापन गर्नेछ ।  

खुलामञ्चमा बनिरहेको ८ सय वेडको क्वारेन्टाइनमा धारा जडान गरिएको छ । सुर्खेत उपत्यका खानेपानी उपभोक्ता समिति सुर्खेतले क्वारेन्टाइनमा दुइ धारा जडान गरेको हो । ‘नेपाली सेनाले धारा जडान गरिदिन आग्ह गरेको थियो,’ संस्थाका अध्यक्ष कुलमणि देवकोटाले भने, ‘सोही अनुसार हामीले दुईवटा धारा जडान गरेका छौं । यो धारा निःशुल्क हुनेछ ।’
नेपाली सेनाले शौचालय निर्माणमा पनि तीव्रता दिएको छ । बिहीवार साँझसम्म क्वारेन्टाइन्को सबै तयारी पूरा हुने नेपाली सेनाले जानकारी दिएको छ ।