बुटवलमा निर्माण गरिको कोरोना विशेष अस्पतालमा भेन्टिलेटर र आइसियू जडान गरिएको छ । अस्पतालमा चारवटा भेन्टिलेटर र आठ वटा आइसियू बेड निर्माण भएका छन् । उपकरण जडानसँगै अब कोरोना संक्रमण देखिएको बिरामीलाई उपचार गर्न सहज हुने भएको छ ।

बुटवल उपमहानगरपालिका र लुम्बिनी प्रादेशिक अस्पतालको सहकार्यमा बुटवल–१२  धागो कारखानामा निर्माण गरेको अस्पताल निर्माण गरिएको छ ।  ५० वेडको कोरोना विशेष आइसोलेन अस्पताल निर्माण भएको छ । उक्त अस्पतालमा हालसम्म ३६ जनाको उपचार भएको छ । जसमध्ये ३५ जना उपचारपछि निको भएर डिस्चार्ज गरिएको मेसु डाक्टर राजेन्द्र खनालले जानकारी गराए  ।

अस्पतालमा उपचार गराउन आएका रुपन्देहीको सैनामैना नगरपालिकाका बाबुराम थापाको उपचारका क्रममा निधन भएको छ । उनको कोरानाका कारण निधन नभएको रिपोर्ट यसअघि नै आइसकेको छ । उनलाई टाइफाइडलगायतका समस्या रहेको भन्दै स्वास्थ्य रिपोर्ट सार्वजनिक भएको थियो ।

मुख्यमन्त्री शंकर पोखरेलले कोरोना भाइरस कोभिड–१९ रोगका विरुद्ध अहिलेसम्म प्रदेशमा देखिएको सावधानीलाई अझ बलियो बनाउनुपर्ने बताएका छन् । यसखालका संरचनाको निर्माणले अब प्रदेशलाई सूरक्षित राख्न सकिने मनोबल उनको टिप्पणी छ ।

बुटवलको आइसीयू र भेन्टिलेटरसहितको अस्पतालको निरीक्षणपछि संक्षिप्त मन्तव्य राख्दै मुख्यमन्त्री शंकर पोखरेलले प्रदेशमा निर्माण भएका यस्ता स्वास्थ्य सेवाका संरचनाले उपचार सेवा कहाँ पाउने भन्ने चिन्ता अन्त्य भएको बताए ।

संक्रमण नियन्त्रणका लागि आवतजावतलाई नियन्त्रण गर्दै समाजिक दूरी कायम गर्नु नै प्रभावकारी उपाय रहेको उल्लेख गर्दै मुख्यमन्त्रीले प्रदेशका सबै जिल्लामा यहीँ उपाय अबलम्बन गरिएको बताए  ।

उनले सबै नागरिकले यही उपाय अबलम्बन गरिरहेसम्म संक्रमण फैलिन नपाउने बताउँदै स्वयंनियममा रहन आग्रह गरे । प्रदेशमा सरकारको आग्रहलाई जनताले सहजतापुर्वक पालन गरेकाले नै अहिलेसम्म सक्रमण रोक्न सकिएको उनको भनाइ थियो ।

त्यसअवसरमा बुटवल उपमहानगरपालिका प्रमुख शिवराज सुवेदी, अस्पतालका अध्यक्ष सूर्यबहादुर भट्टराई, मेसु राजेन्द्र खनाल र गौतमबुद्ध सामुदायिक मुटु अस्पतालका अधयक्ष एजाज आलमले अस्पताल निर्माणका क्रममा भएका सहकार्यलगायतका बारेमा जानकारी गराए ।