भरतपुर महानगरपालिकाले दैनिक ज्यालादारी गरी जीवन गुजार्ने मजदुरलाई बन्दाबन्दी (लकडाउन) समयमा आफ्नो घर जान नपर्ने जनाएको छ । 

कोभिड–१९ को जोखिम हुन नदिन सरकारले लकडाउन जारी राखेको छ ।

मजदुरलाई खानका लागि राहतको व्यवस्था गरेको जनाउँदै महानगरपालिकाले जहाँ रहेको हो त्यहीँ ठाउँमा बसेर लकडाउनको पालना गर्न आग्रह समेत गरेको छ । 

महानगपरपालिका प्रमुख रेनु दाहालले पहिलो चरणमा १२ हजार ८३६ परिवारलाई राहत वितरण गरिसकेको र राहतको आवश्यकता भएका ज्याला मजदुरी गरेर बस्नेलाई राहत प्रदान गर्दै जाने बताइन् । ‘खानाको अभावले बाहिर भौतारिनु पर्दैन,’ उनले भनिन् ।

उद्योग, कलकारखाना, व्यवसायीक प्रतिष्ठान जहाँ रहेका छन् ती ठाउँहरूमा काम गर्नेहरूलाई सम्बन्धित कम्पनीले समेत खानाको व्यवस्था गरिरहेका छन् । असंगठित ठाउँमा काम गर्ने मजदुर समस्यामा परेका हुन् । उनीहरूलाई महानगरले राहत दिएको छ । 

संकटको घडिमा सबैको साथ र सहयोगको अपेक्षा गर्दै उनले अत्यावश्यक भएका परिवारले मात्र राहत लिइदिन आग्रह गरेकी छन् । वडा कार्यालयबाट राहत वितरण गरिएको छ । काठमाडौंसहित विभिन्न शहरबाट भरतपुर महानगर हँुदै आ–आफ्नो गन्तव्य हिडेकाहरूलाई यहाँ खानाको व्यवस्था समेत गरिएको छ । 

नेपाली युवा उद्यमी मञ्चले नारायणगढ र स्थानीयले रामनगरमा पैदल यात्रु र खान नपाएकाहरूलाई स्थानीय तहसँग सहकार्य गरेर दिनहुँ खानाको प्रबन्ध मिलाउँदै आएका छन् । भरतपुर महानगरपालिकाले पहिलो चरणमा १ हजार २ सय १७ क्वीन्टल चामल, १ सय १९ क्वीन्टल दाल, ४ हजार २ सय ५१ लिटर तेल, १ हजार ३ सय ७५ किलो नुन, ३ हजार २ सय ५६ गोटा साबन, २ हजार ४ सय १५ क्रेट अण्डा, १५ क्वीन्टल आलु र चना, २ हजार ३६ प्याकेट भुजा वितरण गरेको जनाएको छ ।