काठमाडौंका सडकलाई चिटिक्क बनाउने काम भइरहेको छ ।

सडक व्यवस्थापनको अभिन्न अंग मानिने सडक चिह्न (मार्किङ) लगाउने काम भइरहेको छ ।

हालसम्म जिल्लाभित्र कालोपत्र थपिएको (ओभर–ले) झण्डै २८ किलोमिटर सडकमा चिह्न लगाएको डिभिजन सडक कार्यालय काठमाडौंले जनाएको छ । ‘लकडाउन’का कारण सबै विकास निर्माण ठप्प हुँदा काठमाडौंका मुख्य र सहायक सडकमा चिह्न लगाइएको हो ।

ती सबै स्थानमा सामाजिक दूरी कायम गरेर काम भएको डिभिजन सडक कार्यालय काठमाडौंका प्रमुख कुबेर नेपालीले बताए ।

धेरै जनशक्ति र उपकरण नचाहिने हुँदा यो समयमा समेत काम गरिएको उनले बताए । उपत्यकामा बालुवाटार, रामशाह पथ, सुन्धारा लगायतका धेरै स्थानमा सडकमा चिह्न लगाइएको छ । उनले भने, ‘सामान्य अवस्थामा सवारीसाधनको चाप बढी हुने भएपनि अहिले सडक खाली हुँदा काम गर्न पनि सजिलो भयो ।’ सडकका दुवै लेनमा ‘ओभर ले’ भएका सडकमा मात्रै सडक चिह्न लगाइएको छ ।

काठमाडौं उपत्यकामा धेरै स्थानमा ‘ओभर ले’को काम ‘लकडाउन’का कारण ठप्प छन् । तीनकुने–गौशाला लगायत एकातिर काम सकिएर अर्काे लेनतर्फ गर्न बाँकी रहेकाले त्यस्ता सडकमा भने चिह्न लगाइएको छैन । ‘अर्काे लेनमा कालोपत्र गर्दा रंग जाने हुनाले अहिले नगरिएको हो,’ उनले भने ।

‘लकडाउन’का समयमा सडक चिन्ह लगाउने कामका कारण उपत्यकाका सडक चिटिक्क देखिएका छन् । एकातर्फ सवारीसधानको चाप कम र अर्काेतिर भर्खर कालोपत्र भएका सडकमा पोतिएका सडक चिन्हले उपत्यकाको मुहार नै फेरिएको छ ।

‘लकडाउन’मा काम गर्दा कतै अवरोध आउँछ कि भन्ने अन्योल भएपनि अहिले यो कामले धेरैको प्रशंसा पाइरहेको छ । सडक चिन्हका कारण यात्रु र चालकसँगै ट्राफिक प्रहरीलाई समेत सडक व्यवस्थापन गर्न सजिलो हुने गरेको छ ।