रुँदारुँदै पैदल यात्रा : लकडाउनमा घर फर्किनेक्रम जारी

कोरोना भाइरस संक्रमणको जोखिम हुन नदिन लकडाउन जारी रहदा पनि गोदावरी नगरपालिकाको चापागाउँ सडक हुँदै कान्ति लोकपथबाट घर फर्किनेको  क्रम जारी रहेको छ । 

‘आफू यता बस्यो परिवार र आफन्तको चिन्ता लाग्छ । कति दिन परिवारको पिर गरेर मन एकातिर ज्यान अर्काेतिर गरेर बस्ने,’ नाम र स्थान नखुलाउँदै एक पुरुषले गहभरि आँसु झार्दै भने ।

‘के थाहा यो रोगको नियन्त्रण कहिले हुन्छ । आपत् विपत्मा परिवारसँगै बसाँै भन्ने लाग्दो रहेछ । गाउँ पुग्न पाए परिवारसँगै बसी भए भात नभए खोलेफाँडो भए पनि खाउँला । दुःख गरौं । परिवारलाई खुशी दिउँ भनेर राजधानी छिरियो । हिँड्दा हिँड्दै परिवारको मुख पो देख्न नपाउने हो कि ! भन्ने डर पनि छ,’ उनले भने ।

यात्राका क्रममा सडकमा दुईबाट चार र चारबाट आठ थपिँदै जाँदा सामाजिक दूरी कायम गर्न सकिन्न । सबैको पीडा एकै किसिमको छ । सबैलाई परिवार भेट्नु पनि छ । ‘सडकमा हिँड्दा एक यात्रुले अर्काे यात्रुलाई कसरी दूरी कायम गर भन्नु । यात्रामा रहेका साथीलाई एक्लै छाडेर हिड्न सभ्यताले आजसम्म सिकाएको छैन,’ घर हिडेका एक यात्रुले भने । 

गोदावरीको लेलेबाट कान्ति लोकपथ शुरुआत हुने हुँदा गोदावरीको चापागाउँ हुँदै वाग्मती गाउँपालिमा, सो गाउँपालिकाको अन्त्य विन्दुमा वाग्मती नदी तरेपछि मकवानपुर जिल्ला हुँदै अन्त्यमा हेटौंडा छिर्ने मानिसको लर्काे दैनिक करीब १ हजार हुने गरेको गाउँपालिकाका अध्यक्ष वीरबहादुर लोप्चनले जानकारी दिए ।

‘यो सडकखण्ड हुँदै घर बाहिरिने मानिसको क्रम रोकिएको छैन,’ उनले भने । बन्दाबन्दीमा किन हिँडेको प्रश्नमा यात्रुले भने, ‘कति दिन कोठामा बसेर खाने । अझ कति दिन बन्दाबन्दी थपिने हो थाहा छैन ।’

सरकारले बन्दाबन्दीभर कोठा भाडा मिनाह हुने कुरो अघि बढाएपनि भाडा नै आयस्रोत हुने घरबेटीलाई कसरी हामी दिन्नौं भन्ने लागेर घर हिँडेको कति यात्रीले बताएका अध्यक्ष लोप्चनले जानकारी दिए । – सुभानु आचार्य/रासस