जनकपुरमा पैसा फालेको अभियोगमा पक्राउ परेका दुई महिलाको कोरोना परीक्षण रिपोर्ट नेगेटिभ आएको छ । र्‍यापिड डाइग्नोस्टिक टेस्ट (आरडीटी) पोजेटिभ आएपछि पीसीआर विधिबाट गरिएको परीक्षणमा ती महिलाको नेगेटिभ आएको प्रादेशिक स्वास्थ्य प्रयोगशाला जनकपुरका निर्देशक रामविनय साहले लोकान्तरलाई जानकारी दिए ।

गत शुक्रवार जनकपुरको महावीर चोकमा २ जना महिलाले रुपैयाँमा थुक टाँसेर फालेको तथा सटरसहित विभिन्न स्थानमा थुक फ्याँकेको हल्ला फैलिएको थियो घटनाबारे प्रहरीलाई जानकारी भएपछि प्रहरी घटनास्थलमा पुगेको थियो ।

जिल्ला प्रहरी कार्यालय धनुषाका प्रहरी नायब उपरीक्षक (डीएसपी) रामेश्वर कार्कीका अनुसार घटनामा तत्काल प्रहरी पठाउन लगाएर पैसालाई सुरक्षित तरिकाले उठाउन लगाइयो, जहाँ १० रुपैयाँका १२ वटा नोट थिए ।

त्यसपछि रुपैयाँमा कोरोना भाइरसको संक्रमण छ कि छैन भन्ने कुराको परीक्षणका लागि प्रादेशिक अस्पताल जनकपुरमा पठाइएको थियो, तर त्यहाँ रुपैयाँमा परीक्षण गर्ने उपकरण नभएकाले रूपैयाँलाई जिल्ला प्रहरी कार्यालय धनुषामा नै सुरक्षित तरिकाले राखिएको छ । 

‘स्थानीयले २ जाना महिलाले पैसा फालेर गएको भनेर बताएका थिए,’ डीएसपी कार्कीले भने, ‘अनुसन्धानका क्रममा त्यहाँ रहेको सीसीटिभी फुटेजमा समेत दुईजना महिला उक्त बाटो बाट गएको फूटेज देखिएको थियो ।’

प्रहरीले फूटेजबाट फोटो प्रिन्ट गरेर मातहतका सबै निकायमा पठाएर खोज तलास गर्ने कामलाई तीव्रता दियो प्रहरीले सामाजिक सञ्जालदेखि सञ्चारमाध्यममा समेत उक्त तस्वीर सार्वजनिक गर्दै उक्त हुलिया सहितको महिला भेटेमा प्रहरीमा खबर गर्न अपिल जारी गरेको थियो ।

जनकपुरमा उक्त कुराको चर्चा मात्र भएन सबै मानिसमा त्रास समेत फैलेको थियो । तस्वीर सार्वजनिक भएपछि जनकपुर उपमहानगरपालिका वडा नम्बर ७ बाट कुनै मानिसले प्रहरीलाई ती महिलाको ठेगानाबारे जानकारी गराएको थियो  । 

प्रहरीले उक्त सूचना पाएलगत्तै ती महिलालाई घरमा पुगेर पक्राउ गरेका थिए । उनीहरूलाई परीक्षणका लागि प्रादेशिक अस्पताल जनकपुरमा पठाइएको थियो  । 

‘त्यहाँ दुवै महिलाको आरडीटी परीक्षण गर्दा १ जना महिलामा एन्टीबडी पोजेटिभ तथा अर्को महिलामा नेगेटिभ नतिजा आएको थियो,’ प्रादेशिक अस्पताल जनकपुरका निमित्त मेडिकल सुपरिटेन्डेन्ट डा. जामुनप्रसाद सिंहले लोकान्तर संग भने, ‘एक जनामा तत्काल पोजेटिभ देखिएपछि थप पुष्टिका लागि स्वाब समेत संकलन गरिएको थियो।’

प्रयोगशालाका भाइरोलोजिस्ट मनमोहन मिश्रका अनुसार २ महिलासहित कुल ५ जनाको थ्रोट र नोजल स्वाब शनिवार राति ८ बजे संकलन गरिएको थियो  ।

‘यसअघि मात्र थ्रोट स्वाब संकलन हुने गरेकोमा उक्त केसको संवेदनशीलता तथा गम्भीरता बढी नै भएका कारण दुवै स्वाब संकलन गरिएको थियो,’ मिश्रले भने, ‘स्वाब संकलन गर्ने क्रममा ती महिलाहरूले त्यति सहयोग त गर्नुभएको थिएन, तर पछि जसरी पनि लिन सफल भएका थियौं ।’

पैसा किन फ्याँकिएको थियो ?

पैसा ती महिलाहरूले फ्याकेकै थियो वा खसेको थियो, थुक लगाएको थियो वा थिएन, किन उक्त घटना भयो भन्ने कुराको अनुसन्धान अहिलेसम्म जारी नै रहेको डीएसपी कार्कीले बताए  ।

ती महिलाका भाइले भने उनीहरूले पैसा नफालेको बताएका छन् । उनीहरू नातामा नन्दभाउजू पर्छन् ।

शुक्रवार जनकपुरको सहयोगी विकास बैंकबाट १ लाख रुपैयाँ आफ्नो खाताबाट निकालेर आफ्नो घर फर्किने क्रममा १ सय ७५ रुपैयाँ खसेको थियो, त्यो कुरा उनीहरूले घर आएपछि मात्र थाहा पाएको उनले बताए  ।  

‘अब रुपैयाँ हरायो, धेरै रुपैयाँ पनि थिएन, त्यसैले खोज्न पनि गएनन्,’ उनका भाइले भने, ‘तर पछि सामाजिक सञ्जालदेखि विभिन्न समाचारमा समेत ती दुई महिलाको खोजी भइरहेको कुरा शनिवार बिहान मात्र हामीले थाहा पाउन सकेका थियौं ।’

अब प्रहरीले खोजिरहेको छ भन्ने कुरा थाहा पाएपछि उनीहरू डराए, र प्रहरीलाई खबर गरेनन् । त्यत्तिकैमा शनिवार २ बजेतिर प्रहरीले उनीहरूलाई पक्राउ गरेर लगे । 

उनीहरूको कोरोनापोजेटिभ आयो भनेर कतिपयले बाहिर हल्ला गरेपनि आधिकारिक रूपमा हालसम्म आफूहरूलाई कुनै जानकारी नरहेको उनले बताए  । 

यता शनिवार बिहानैदेखि उक्त एरियामा जनकपुरधाम उपमहानगरपालिकाका प्रमुख लालकिशोर साहले स्प्रे मेसिन लगेर स्यानिटाइज गराएका छन् ।

सफाइकर्मीलाई परिचालन गरेर ती सम्पूर्ण मोहल्लामा स्यानिटाइज गराइएको छ ।

‘अहिले स्वाबको परिणाम नआएकाले ती क्षेत्रमा शीलबन्द नै त गरेका छैनौं,’ वडा नम्बर ७ का वडाध्यक्ष जानकी राम साहले भने, ‘तर कसैलाई पनि अन्य टोलमा नजान तथा आफ्नै घरमा होम क्वारेन्टाइनमा बस्न भनेर अपिल गरेका छौं ।’