प्रधानमन्त्री केपी शर्मा ओलीले लकडाउनको अवस्थामा घर जान चाहनेलाई प्रदेश र स्थानीय सरकारसँग समन्वय गरेर सुरक्षितरुपमा व्यवस्थापन गर्न निर्देशन दिएसँगै कास्कीमा अलपत्र मजदुरको उद्धार शुरू भएको छ ।

पोखरा महानगरपालिका तथा अन्य संघसंस्थाले घर जान नपाएर अलपत्र नागरिकलाई सहजरूपमा घरसम्म पुर्‍याउन शुरू गरेका हुन् ।

कोभिड–१९ को सम्भावित जोखिम न्यूनीकरण गर्न सरकारले आह्वान गरेको लकडाउनका कारणले गाडी नचल्दा घर जान नपाएका मजदुरलाई पोखरामा वडाले समन्वय गरेर गन्तव्यसम्म पुर्‍याउन शुरू गरेको छ । महानगरको वडा नम्बर १६, ११ र वडा नम्बर १९  को समन्वयमा बुधवार साँझ रोल्पा र दाङका २१५ मजदुरलाई पोखराबाट ५ वटा बसमा उनीहरूको घरतर्फ पठाइएको हो ।

रोल्पाका १७५ जनालाई ४ बसमा लिवाङसम्म र दाङका ४० जनालाई सदरमुकामसम्म पुर्‍याउने व्यवस्था गरिएको वडा नम्बर १६ का वडाध्यक्ष जीवनप्रसाद आचार्यले जानकारी दिए । गण्डकी प्रदेश सरकार तथा महानगरका विभिन्न पूर्वाधार निर्माणका आयोजनामा खटिएका मजदुरलाई घर पठाइएको हो ।

साँझ ७ बजे पोखराबाट दाङका लागि ४० मजदुरलाई गाडीको व्यवस्था गरी पठाइएको छ । मंगलवार नेपालगञ्जका लागि १९ र कोहलपुरसम्म १३ जनालाई जाने व्यवस्था गरिएको थियो । लकडाउनका कारणले काम गर्दै आएको ठाउँमा सामलको अभाव भएपछि मजदुर घर जान कष्टकर यात्रा शुरू गरेपछि सरकारले उनीहरूको उद्धार गरी सहजरूपमा घर पुर्‍याउने निर्णय गरेको थियो ।

लकडाउनकै अवधिमा यसअघि चैत १७ गतेसम्म जिल्ला प्रशासन कार्यालयको समन्वयमा ३ हजार २०० हाराहारीमा मजदुरको निर्माण व्यवसायीले साइटबाट उद्धार गरी घर पठाएको नेपाल निर्माण व्यवसायी संघ कास्कीका अध्यक्ष सुरेश श्रेष्ठले बताए । दोस्रोपटक थप गरिएको लकडाउनपछि प्रशासनले पास वितरणमा कडाइ गरेपछि मजदुरको उद्धार हुन सकेको थिएन ।