सांसद कँडेलले दिए पत्रकार र स्वास्थ्यकर्मीलाई खाजा र पानी

प्रतिनिधिसभा सदस्य एंव पूर्व गृहराज्यमन्त्री देवेन्द्रराज कँडेलले पश्चिम नवलपरासीका पत्रकार र स्वास्थ्यकर्मीलाई खाजा स्वरुप चाउचाउ र पानी उपलब्ध गराएका छन् ।

कोरोना संक्रमणविरुद्ध अग्रपंक्तिमा रहँदै आएका पत्रकार र स्वास्थ्यकर्मीलाई सांसद कँडेलले जिल्ला समन्वय समितिमार्फत सामाग्री उपलब्ध गराएका हुन् ।

नेपाली कांग्रेसका केन्द्रीय सदस्यसमेत रहेका कँडेलले उपलब्ध गराएका खाजा जिल्ला समन्वय समितिका प्रमुख शिवशंकर रायले नेपाल पत्रकार महासंघ र स्वास्थ्य कार्यालयलाई हस्तान्तरण गरेका हुन् । खाजा उपलब्ध गराउँदै सांसद कँडेलले लकडाउनका कारण पसलहरु बन्द रहेको अवस्थामा समाचार संकलनका लागि फिल्डमा खटिने पत्रकार र सर्वसाधारणको स्वास्थ्य सेवा खटिने स्वास्थ्यकर्मीलाई सहजरुपमा खाजाको व्यवस्था गर्न उक्त सामाग्री उपलब्ध गराएको बताए ।

उपलब्ध गराएका सामाग्रीमा नेपाल पत्रकार महासंघलाई ४० पेटी चाउचाउ र ४० पेटी पानी छ । त्यसैगरी ७ वटै स्थानीय तहमा कार्यरत स्वास्थ्यकर्मीका लागि २४० पेटी चाउचाउ र १७५ पेटी पानी छ । जसअनुसार ३ वटा नगरपालिकालाई जनही ४० पेटी चाउचाउ र २५ पेटी पानी तथा ४ वटा गाउँपालिकालाई जनही ३० पेटी चाउचाउ र २५ पेटी पानी उपलब्ध गराइएको छ ।  

उपलब्ध खाजा जिल्लामा हाल सञ्चालनमा रहेका सञ्चारगृह र सम्पूर्ण पत्रकारलाई उपलब्ध गराइने पत्रकार महासंघका सचिव राजकुमार रेश्मीले बताए । स्वास्थ्यकर्मीलाई उपलब्ध गराइएको खाजा सम्बन्धित पालिकाका स्वास्थ्य संस्थामार्फत उपलब्ध गराइने स्वास्थ्य कार्यालयका प्रमुख गौरव ढकालले बताए ।