नेपाली कांग्रसले सरकारका पूर्वसचिव भीम उपाध्यायको रिहाइको माग गरेको छ। 

सामाजिक सञ्जालमा भ्रमपूर्ण अभिव्यक्ति दिएको आरोप लगाई प्रहरीले उनलाई बुधबार पक्राउ गरेको घटनाप्रति कांग्रेसले ध्यानाकर्षण भएको जनाएको छ।

कांग्रेस संसदीय दलको सञ्चार तथा सूचना प्रविधि मन्त्रालय समन्वय समितिका संयोजक बहादुरसिंह लामाले बिहीबार विज्ञप्तिमार्फत पूर्वसचिव उपाध्यायको पक्राउ संविधानको मर्म भावना विपरित रहेको भन्दै निजलाई विनासर्त तत्काल रिहा गर्न सरकारसँग माग गरेका हुन्।  

नेपालको संविधानले प्रत्येक नेपाली नागरिकलाई विचार र अभिव्यक्तिको स्वतन्त्रता प्रदान गरेको उल्लेख गर्दै उनले सबै नेपालीले आफ्नो विचार राख्न पाउनु नैसर्गिक अधिकार भएको बताए।