पार्टीका विद्यमान समस्या समाधान गरेपछि मात्र सचिवालय र स्थायी कमिटी बैठक बोलाउने भनी प्रधानमन्त्री एवं पार्टी अध्यक्ष केपी शर्मा ओली पक्षले गरेको प्रस्ताव वरिष्ठ नेता माधवकुमार नेपाल पक्षले अस्वीकार गरेको छ ।

कोटेश्वरस्थित नेता नेपालको निवासनजिकै रहेको वन पैदावार उद्योग व्यवसायी महासंघको भवनमा भएको छलफलमा विभिन्न प्रस्ताव आएपनि आफूहरूले सचिवालय र स्थायी कमिटी बैठक बोलाएर समस्याको निकास खोज्नुपर्ने सुझाव दिएको बैठकमा सहभागी नेपालपक्षीय नेता भीम रावलले लोकान्तरलाई जानकारी दिए ।

'अनौपचारिक कुराकानी भयो, उहाँहरूले विभिन्न प्रस्ताव ल्याउनुभएको थियो, समाधान खोजौं अनि मात्र बैठक बोलाउँला भन्नुभएको थियो,' रावलले भने, 'हामीले तत्काल सचिवालय र स्थायी कमिटी बैठक बोलाउनुपर्छ, सबै समस्याको समाधान सचिवालय र स्थायी कमिटी बैठकबाट मात्र सम्भव छ भन्यौं ।'

नेता नेपाललाई पार्टी अध्यक्ष बनाउने प्रस्ताव आएको भन्ने कुरा भने हल्ला मात्र रहेको नेता रावलले बताए ।

'उहाँ (माधव नेपाल)लाई अध्यक्षको प्रस्ताव आएको भन्ने कुरामा सत्यता छैन, यो हल्ला मात्र हो,' रावलले लोकान्तरसँग भने ।

छलफलमा ओली पक्षबाट उपप्रधान एवं रक्षामन्त्री ईश्वर पोखरेल, महासचिव विष्णु पौडेल, परराष्ट्रमन्त्री प्रदीप ज्ञवाली र प्रदेश ५ का मुख्यमन्त्री शंकर पोखरेल तथा नेपाल पक्षबाट स्वयं नेता नेपाल, भीम रावल, सुरेन्द्र पाण्डे र रघुजी पन्तलगायत सहभागी थिए ।

त्यसक्रममा आफूहरूले पार्टीभित्र देखिएको समस्यालाई निकास दिने दायित्व पार्टी अध्यक्ष एवं प्रधानमन्त्री भएको नाताले स्वयं प्रधानमन्त्रीको रहेकाले तत्काल बैठक बोलाउन आग्रह गरेको छलफलपछि नेता रघुजी पन्तले जानकारी दिए ।

नेपाल पक्षले भोलिका लागि सचिवालय र त्यसबाट समाधान नभएका समस्या पर्सि स्थायी कमिटी बैठक बसेर छलफलबाट निकासको मार्ग प्रसस्त गर्न प्रधानमन्त्री ओलीलाई सुझाव दिएको छ ।

'पार्टीभित्र समस्या आएको छ, त्यसलाई निकास दिने काम पार्टी अध्यक्ष एवं प्रधानमन्त्रीको भएको नाताले तत्काल सचिवालय र स्थायी कमिटी बैठक बोलाउन सुझाव दिएका छौं,' पन्तले भने ।