५ नम्बर प्रदेशमा भरिए क्वारेन्टाइन, भैरहवा, बाँके र दाङबाट पीसीआर परीक्षण

५ नम्बर प्रदेशमा बनाइएका क्वारेन्टाइन भरिएका छन् । पहिलो चरणमा राखिएका २ हजार ५०० जनालाई होम क्वारेन्टाइनमा पठाइएपनि भारत, काठमाडौं तथा अन्य शहरबाट आएकालाई क्वारेन्टाइनमा राखिएको छ ।

बाहिरी जिल्लाबाट भित्रिएकाहरू पनि सरासर गाउँ जाँदा जोखिम बढेपछि स्थानीय तह र प्रदेश सरकारले गाउँ भित्रिनेलाई क्वारेन्टाइनमा राखेको छ ।

सरकारले अब कोरोना भाइरस (कोभिड–१९) को परीक्षण २ र ५ नम्बर प्रदेशमा केन्द्रित गर्ने बताएको छ । ५ नम्बर प्रदेशका ५६३ स्थानमा रहेका क्वारेन्टाइन १२ हजार ६५ जना बसिरहेका छन् ।

प्रदेश सामाजिक विकास मन्त्रालयको स्वास्थ्य सेवा महाशाखा प्रमुख डा. उमाशंकरप्रसाद चौधरीले पहिलो चरणमा बसेकालाई आरडीटी जाँच गरेर होम क्वारेन्टाइनमा पठाएको बताए ।

‘पहिला बसेका घर पठाइयो । अहिले भारतको क्वारेन्टाइनमा बसेर आएका, काठमाडौं, बुटवलबाट गाउँ गएकाहरूलाई पनि क्वारेन्टाइनमा राखिएको छ,’ डा. चौधरीले भने, ‘बजारबाट गाउँ फर्किएकाहरूलाई पनि स्थानीय तहको पहलमा क्वारेन्टाइनमा राखिएको छ ।’ तर बन्दाबन्दी (लकडाउन) पछि प्रदेशमा कति मानिस बाहिरी जिल्ला, भारत र तेस्रो मुलुकबाट भित्रिए भन्ने आधिकारिक तथ्यांक भने छैन । 

केही दिनयता विभिन्न शहरबाट नेताको पहलमा सर्वसाधारणहरू धमाधम गाउँ भित्रिएका छन् । कोही हिँडेर त कोही जनप्रतिनिधिको पहलमा गाडीको व्यवस्था गरी गाउँ पुगेका छन् ।

सबैभन्दा धेरै रोल्पामा ६ हजार ८०९ जनालाई क्वारेन्टाइनमा राखिएको छ । बर्दियामा २ हजार ८७२, बाँकेमा २३२, कपिलवस्तुमा ३००, अर्घाखाँचीमा २२८, रूपन्देहीमा २४५, पाल्पामा १६५, गुल्मीमा १२९, पश्चिम नवलपरासीमा ९४, रुकुमपूर्वमा १२६ र प्युठानमा ७४३ जना क्वारेन्टाइनमा छन् । प्रदेशभरका क्वारेन्टाइन १६ हजार ६३० शय्या छन् । 

डा. चौधरीले प्रदेशमा ३ हजार ५२८ जनाको आरडीटीबाट कोरोना जाँच गर्दा १ जनाको बाहेक अन्य सबैको ‘नेगेटिभ’ आएको बताए । पश्चिम नवलपरासीका १ पुरुषको आरडिटी पोजेटिभ देखिएपनि पीसीआर जाँच गर्दा नेगेटिभ रिपोर्ट आएको थियो । सामाजिक विकास मन्त्रालयका सचिव गोपी खनालले ‘रिस्क जोन’बाट आएर क्वारेन्टाइनमा बसेका व्यक्तिलाई पीसीआर जाँच गरेर मात्र घर जान दिइने बताए । ‘क्वारेन्टाइनमा रहेका सबैको जाँच गर्न सम्भव छैन । ‘रिस्क जोन’बाट आएकाहरूको जाँच हुुन्छ,’ उनले भने । रोल्पामा कोरोना जाँच गर्ने किटको अभाव भएको उनले बताए ।

प्रदेशका विभिन्न ३ शहरबाट कोरोना भाइरसको पीसीआर विधिबाट जाँच भइरहेको छ । रूपन्देहीको भैरहवा, बाँकेको नेपालगञ्ज र दाङको घोराहीबाट कोरोनाको जाँच भइरहेको छ । हालसम्म ५ नम्बर प्रदेशमा कोरोना भाइरस संक्रमित भेटिएका छैनन् । 

भैरहवामा २ वटा मेसिन सञ्चालन भएर दैनिक ९० वटा स्वाब परीक्षण गर्न सकिन्छ । हालसम्म २४६ वटा स्वाब जाँच गरिएको प्रदेश जनस्वास्थ्य प्रयोगशाला निमित्त प्रमुुख राजेन्द्र गिरीले जानकारी दिए । प्रदेशका ६ वटा जिल्ला भारतसँग जोडिएका छन् । सिमावर्ती भारतीय जिल्लामा कोरोनाका बिरामी थपिँदै गएका छन । जसले गर्दा ५ नम्बर प्रदेशमा पनि कोरोना जोखिम बढ्दो छ ।