प्रमुख प्रतिपक्षी दल नेपाली कांग्रेसले देशको अर्थतन्त्रमा कोरोनाले पारेको प्रभावको अध्ययन, विश्लेषण गर्न र आवश्यक दृष्टिकोण निर्माण गर्न अर्थतन्त्र केन्द्रित विशेष समिति निर्माण गरेको छ ।

गत वैशाख १७ गते बसेको कांग्रेस केन्द्रीय समितिको बैठकले यस्तो समिति निर्माण गर्ने निर्णय गरेको थियो । केन्द्रीय समितिको बैठकले गरेको निर्णय अनुसार सभापति देउवाले १४ सदस्यीय समिति निर्माण गरेका हुन् ।

समितिमा विगतमा अर्थ मन्त्रालयमा मन्त्री र राज्यमन्त्रीको जिम्मेवारी सम्हालेका र संसदीय दलमा अर्थ मन्त्रालयको संयोजन गरिसकेका व्यक्तिहरू रहेका छन् । समितिको संयोजन भने पूर्वअर्थमन्त्री डाक्टर रामशरण महतले गर्नेछन् ।

सदस्यहरूमा महेश आचार्य, ज्ञानेन्द्रबहादुर कार्की, डाक्टर नारायण खड्का, डाक्टर मिनेन्द्र रिजाल, चिनकाजी श्रेष्ठ, दीपकुमार उपाध्याय. भारत शाह, उदय शमशेर राना. डाक्टर पृथ्वीराज लिगल, डाक्टर शंकर शर्मा, डाक्टर जगदीशचन्द्र पोखरेल, डाक्टर गोविन्द पोखरेल र डाक्टर स्वर्णिम वाग्ले रहेको केन्द्रीय कार्यालयले विज्ञप्तिमा उल्लेख गरेको छ ।

समितिले तत्कालीन रुपमा अत्यावश्यक राहतबारे सुझाव, अल्पकालीन रुपमा आगामी बजेटको प्राथमिकताबारे धारणा र दीर्घकालीन रूपमा कोरोनापछिको अर्थतन्त्र बारे दुरगामी दृष्टिकोण निर्माण गर्नेछ ।

समितिको अध्ययन, विश्लेषण र अभिमतका आधारमा नेपाली कांग्रेसले आफ्नो अवधारणा र भुमिकालाई थप परिस्कृत एवं थप प्रभावकारी बनाउने विज्ञप्तिमा उल्लेख गरिएको छ ।