भारतका विभिन्न शहरबाट सीमामा आएर अलपत्र परेको नेपालीलाई बुधवार रुपन्देहीको बेलहिया (सुनौली) नाकाबाट नेपाल ल्याउने तयारी भइरहेको छ ।

जिल्ला प्रशासन कार्यालय रुपन्देही र स्थानीय तहको सहकार्यमा १ हजारभन्दा बढी नेपालीलाई रुपन्देहीमा ल्याउन लागिएको हो ।

स्वदेश फर्किन लागेका नेपालीले भारतका विभिन्न शहरमा क्वारेन्टाइन अवधि पूरा गरिसकेका जनाइएको छ ।

सीमाबाट ल्याइएका नेपालीलाई रुपन्देहीको सिद्धार्थ नगरपालिका, तिलोत्तमा नगरपालिका, ओमसतिया र रोहणी गाउँपालिका विभिन्न विद्यालयमा बनाइएका क्वारेन्टाइनमा राखिने छ । सीमा पारि झण्डै १ हजार ६०० नेपाली १ महिना अघिदेखि आएर क्वारेन्टाइनमा बसेका छन् ।

अन्य ६०० जनालाई के गर्ने भन्नेबारे हालसम्म यकिन छैन । सीमामा आएका नेपाली, गुल्मी, पाल्पा अर्घाखाँची, स्याङजा, रुपन्देही लगायत जिल्लाका छन् ।

अलपत्रलाई सीमापारि नै रोक्दा लुकीछिपी नेपाल प्रवेश गर्न क्रम बढेपछि संक्रमणबाट जोगिन वैधानिक रुपमा नाकाबाट ल्याउन लागिएको हो । रुपन्देहीका प्रहरी प्रमुख हेम थापाले ल्याउने तयारी भएपनि कतिखेर ल्याउने भन्नेबारे टुंगो लाग्न नसकेको बताए ।

‘हामी अहिले मिटिङमै छौं । पारि मान्छे धेरै आएका छन् । केहीलाई ल्याउने, केहीलाई छोड्दा समस्या उत्पन्न हुन्छ कि भन्ने पनि छ । कसरी अगाडि बढ्ने भन्नेमै छौं अहिले,’ उनले भने ।

नेपाल ल्याइएकालाई भैरहवाको लिलाराम न्यौपाने मावि, भैरहवा मावि, तिलोत्तमा नगरपालिका–१४ को मधवलिया माविमा कम्तिमा २/२ सयका दरले राखिने छ । तिलोत्तमा नगरपालिका प्रमुख बासुदेव घिमिरेले अलपत्रलाई बुधवारै ल्याइने बताए । ‘हामीले अहिले २०० जनालाई राख्न सक्छौं भनेको छौं । आवश्यक देखिए ३०० पनि राख्न सक्छौं,’ मेयर घिमिरेले भने । 

भारतमा मंगलवारदेखि रेल सेवा शुरू भएपछि सीमा अझै नेपाली बढ्ने देखिएको छ । सिद्धार्थनगर नगरपालिकाका प्रमुख हरि अधिकारीले रुपन्देहीका स्थानीय तहको सहकार्यमा अलपत्र नेपालीलाई भित्र्याउन लागिएको बताए । ‘सबैलाई सुरक्षित ल्याउनुपर्नेछ, सुरक्षित रुपमै राख्नुपर्छ,’ उनले भने ।

कपिलवस्तुका केही स्थानीय तहले पनि मंगलवार ५०० अलपत्रलाई जिल्ला भित्र्याएर क्वारेन्टाइनमा राखेको प्रमुख जिल्ला अधिकारी दीर्घनारायण पौडेलले जानकारी दिए । उनले भने, ‘सीमामा अझै १ हजार ५०० जना नागरिक रोकिएका छन् । राम्रो व्यवस्थापन गरेका केही पालिकाले हिजो ५ देखि ६ सय नेपालीलाई सुरक्षित रुपमा भित्र्याएर क्वारेन्टाइनमा राख्नुभएको छ ।’

रुपन्देही र कपिलवस्तुमा कोरोना संक्रमित लुकीछिपी छिरेका छन् । रुपन्देहीमा १६ र कपिलवस्तुमा २९ जना संक्रमित छन् । संक्रमितको बुटवलस्थित कोरोना विशेष अस्पतालमा उपचार भइरहेको छ ।