रौतहटमा आइतवार बिहान १० जनामा कोरोना संक्रमण पाइएको छ । रौतहटको राजपुर फरहदवा नगरपालिका वडा नम्बर ९ स्थित बैरिया गाउँको एक मदर्सामा संचालित क्वारेनटाइनमा रहेका ७ जनामा कोरोना संक्रमण पाइएको छ । १८, ३२,३६,३९,३९, ४२ र ४८ बर्षका ७ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयका सह प्रवक्ता समिरकुमार अधिकारीले जनाएका छन् । 

 उक्त नगरपालिकाका नगर प्रमुख मोहम्म्द सकिल अख्तरका अनुसार संक्रमित सातै जना भारतको मुम्बई बाट आएका थिए । संक्रमित सबै जना बैरिया स्थित मदर्सामा संचालित क्वारेनटाइनमा रहेको उनले बताए । उनीहरू सीमा नाकामा आई सके पछि स्थानीय प्रशासन र नगरपालिकाको समन्वयमा उनीहरूलाई बैशाख ३१ गते नेपाल भित्रियाइएको थियो । उक्त नगरपालिकाका जन स्वास्थ्य अधिकृत रबीन्द्र कुमार झाका अनुसार करीब दुई किलोमीटर जति दूरीमा रहेको बंजरहा नाका बाट उनीहरूलाई भित्रियाइएको थियो । 

‘उनीहरू नाका बाट पैदल नै हिडेर क्वारेनटाइन सम्म आएका थिए,’  झाले भने,‘ उनीहरू घर भने गएका थिएनन् । ’ उक्त क्वारेनटाइनमा अहिले कुल  ८० जना छन् ।  उक्त मदर्सामा १ हजार जति मानिस अटाउन  सक्ने क्षमता रहेको उनले बताए । 

संक्रमित सातै जनालाई उपचारका लागि बिरगंज पठाउने तयारी गरिएको छ । त्यसै गरी रौतहटको ईशनाथ नगरपालिकामा समेत तीन जनामा कोरोना संक्रमण पुष्टि भएको छ ।  उक्त नगरपालिकाको वडा नम्बर ३ औरैया र वडा नम्बर ५ मोतीपुरका २८,३० र ३३ बर्षीय पुरुष संक्रमित रहेको स्वास्थ्य मन्त्रालयले पुष्टि गरेको छ ।

उक्त नगरपालिकाका प्रमुख संतोष कुमार मेहताका अनुसार संक्रमित तिनै जना भारतको दिल्ली बाट आएका थिए । 

‘६ दिन अगाडि लुकी छिपी बोर्डर कटेर उनीहरू आएका थिए,’ नगर प्रमुख मेहताले भने,‘तीन जना मध्ये दुई जना सीधा क्वारेनटाइनमा आएको तथा एक जना आफ्नो घरको चापाकलमा नुहाउन गएको भन्ने कुरा आएको छ ।’ उनीहरू घर गए वा सीधा क्वारेनटाईनमा आए त्यसको अनुसन्धान भई रहेको उनले बताए ।

उनीहरू वडा नम्बर ३ स्थित औरैयामा संचालित क्वारेन्टाइनमा रहेका छन् । शुक्रवार क्वारेनटाइनमा रहेका २७ जनाको स्वाब संकलन गरिएकोमा २ जनाको रिजल्ट पोजेटिभ आएको मेहताले बताए ।