राष्ट्रिय जनता पार्टी (राजपा)का सांसद लक्ष्मणलाल कर्णले भारतीय सीमामा काँडेतार र पर्खाल लगाउन एक महिनाको तलब दिन्छौ भन्ने सांसदलाई नारा लगाएर राष्ट्रियता देखाउनु भन्दात्यो तलब गरीब किसानलाई मल खरिद गर्नका लागि दिन सुझाव दिएका छन् ।

उत्ताउला कुरा गर्नुभन्दा गरीब, किसानको जीवनस्तर उकास्नेतर्फ लाग्न उनको सुझाव छ ।

‘कृषिका लागि पनि जुन प्राथमिकता राख्नु पर्ने हो राखेको छैन, अहिले उताबाट एसएसबी र यताबाट सशस्त्र प्रहरीले घेरेर भारतको बोर्डर करीब–करीब सिल गरेको छ, बरु किसानले मलबिउ पाउँदैनन्, सिंचाइको व्यवस्था छैन,’ आइतवार प्रतिनिधि सभा बैठकमा सरकारका नीति तथा कार्यक्रममाथि संशोधन प्रस्ताव राख्दै सांसद कर्णले भने, ‘मैले एकदुई जना माननीयज्यूले त्यहाँ पर्खाल निर्माण गर्न कोहीले एक वर्ष त कोहीले एक महिनाको तलब दिन्छु भनेको पढें । म उहाँहरूसँग विनम्र अनुरोध गर्छु, पहिले गएर आफ्नै एक महिना हो कि दुई महिना हो या दुई दिनको तलब आफ्ना किसानलाई रासायनिक मल खादकोे व्यवस्था गर्नुस् । भाषण गरेर हुँदैन, पर्खाल बन्द गरेर तारबार लगाएर त्यसको परिणमा के त ? राज्यले त्यसको विकल्प सोचेको छ ? प्रबन्ध गरेको छ ? नारामा मात्र राष्ट्रियता देखाएर हुँदैन । किसानको आर्थिक अवस्था सुधार्न जरुरी छ ।’

यसअघि प्रतिनिधि सभा र राष्ट्रिय सभाका केही सांसदले भारतसँग सीमा व्यवस्थापन गर्नुपर्ने भन्दै सरकारले पर्खाल या काँडेतार लगाएमा एक महिनाको तलब दिने घोषणा गरेका थिए । 

सांसद कर्णले देशमा राजनीतिक स्थायित्व कायम भएको भन्ने कुरा गलत भएको बताए । ‘कोरोनाले शान्ति देखेको छ, मान्छेको मन अहिले पनि अशान्त छ,’ उनले भने ।

उनले राहतको नाममा भोजन बाँड्ने मात्र नभई कृषि, उद्योय, पर्यटन लगायतका क्षेत्रमा पनि राहत दिन माग गरे ।