कपिलवस्तुमा नर्ससहित ११ जना कोरोना संक्रमणमुक्त भई घर फिर्ता भएका छन् ।

कपिलवस्तु अस्पतालमा कार्यरत नर्स कोरोना भाइरसको संक्रमणबाट मुक्त भएको जनाउँदै सोमवार घर फिर्ता भएपछि जिल्लामा कोरोना भाइरसलाई जितेर घर जानेको संख्या बढेको छ ।

 गत वैशाख ३० गते पहिलो पटकको रिपोर्टमा पोजेटिभ आएपछि नर्सलाई अस्पतालको आइसोलेसनमा राखिएको थियो । कपिलवस्तु नगरपालिका तौलिहवा निवासी २५ वर्षीया नर्सलाई घर पठाइएको हो । नर्स संक्रमित भएपछि अस्पतालका कर्मचारी र परिवारसहित ११० जनाको पीसीआर जाँच गर्दा नेगेटिभ आएको थियो ।

नर्सको क्रमशः दोस्रो र तेस्रो पटक जेठ १ र ४ गते २ पटक जाँच गर्दा रिपोर्ट नेगेटिभ आएको थियो । नेपालमै पहिलो स्वास्थ्यकर्मी संक्रमित भएर १४ दिनमै कोरोना जित्न सफल भएको अस्पतालका डा. किशोर बञ्जाडेले बताए । उनलाई थप १ हप्ता होम क्वारेन्टाइनमा बस्न सुझाव दिइएको छ ।

शनिवार कपिलवस्तु नगरपालिका तथा मायादेवी र यशोधरा गाउँपालिकाका ३/३ र बुद्धभूमि नगरपालिकाका १ जनालाई बुटवलको कोरोना विशेष अस्पतालबाट घर पठाइएको थियो । कपिलवस्तुमा सोमवारसम्म ८३ जनामा कोरोना संक्रक्रमण देखिएको छ ।