साझा पार्टीले रुकुम पश्चिममा अन्तरजातीय विवाहका लागि गएका भनिएका युवाको हत्या हुनुलाई मानवता विरुद्धको बर्बर र नृशंस अपराधको संज्ञा दिएको छ ।

पार्टीका संयोजक रवीन्द्र मिश्रले मंगलवार विज्ञप्ति जारी गर्दै १ जना दलित युवा नवराज विश्वकर्मा र उनका २ जना साथीको हत्या भएको घटना नृशंस अपराध भएको जनाएका छन् ।

सत्तारूढ दलको वडा अध्यक्षसमेत आक्रमणमा संलग्न भएको समाचार झनै चिन्ताजनक रहेको विज्ञप्तिमा जनाइएको छ । 

‘घटनाबारे छानबिन गर्न गृह मन्त्रालयले पाँच सदस्यीय समिति गठन गरेको त छ तर घटनालाई सामसुम पार्न राजनीतिक सकृयता बढेको चर्चा चलिरहँदा छानबिन समिति राजनीतिक प्रभावबाट मुक्त होस् भनी साझा पार्टी खबरदारी गर्दछ,’ विज्ञप्तिमा लेखिएको छ, ‘पछिल्लो यो लगायत मुलुकका अन्य क्षेत्रमा पनि बारम्बार भइरहने दलितविरुद्धको भेदभावले नेपालको संविधानले न्यायपूर्ण, भेदभावरहित र समावेशी समाजको परिकल्पना गरे पनि गाउँगाउँसम्म आफ्नो प्रभुत्व र प्रभाव रहेका राजनीतिक दलहरू र समाजका अगुवाहरूले जातीय भेदभावको मध्ययुगीन पाशविक कृत्यलाई हटाउन नसकेको स्पष्ट संकेत गर्दछ ।’

जातीय विभेद तथा छुवाछुत अन्त्य गर्नको लागि संवैधानिक र कानूनी व्यवस्था गरेर मात्र नपुग्ने जनाइएको छ । ‘त्यसको प्रभावकारी, व्यवहारिक कार्यान्वयनका लागि उपयुक्त संयन्त्रको निर्माण गरियोस्, दोषीमाथि कडाभन्दा कडा सजायको स्पष्ट व्यवस्था गरियोस् र राष्ट्रियस्तरमै सामाजिक सचेतना कार्यक्रमहरू शुरू गरोस् भनी साझा पार्टी जोडदार माग गर्दछ,’ विज्ञप्तिमा लेखिएको छ ।

साझा पार्टीले छुवाछुत तथा जातीय विभेदविरुद्ध शुन्य सहनशीलतामा विश्वास गर्ने जनाउँदै आफ्ना सदस्य लगायत आम सर्वसाधारणलाई अग्रपंक्तिमा रहेर विभेदविरुद्ध काम गर्न आग्रह गरेको छ ।